Турските власти издадоа налози за приведување на 42 новинари, објави Си Ен Ен Турк, што е најнова мерка во големата акција поврзана со неуспешниот воен удар.
Еден инсајдер од АКП партијата на Ердоган денес преку Твитер објави нова листа на уште 100 новинари на кои им се заканува апсење. Тој претходно ја објави листата на 42 новинари за кои денес има налог за приведување и тој список се испостави дека е точен.
Според полицијата новинарите се приведуваат во врска со истрагата за муслиманскиот свештеник Фетула Ѓулен кој се наоѓа во САД и кого Анкара го обвинува дека стои зад воениот удар на 15 и 16 јули, во кој загинаа 246 луѓе.
Новинарите работат во веснкот Заман кој се поврзува со Ѓулен, кој беше преземен од турските власти во март годинава, како дел од акцијата за справување со неговите поддржувачи.
Од овие 42 новинари петмина беа уапсени а 11 ја напуштија земјата. Полицијата трага во Бодрум по Назли Иличак, позната новинарка која во 2013 година беше отпуштена од дневникот Сабах поради тоа што ги критикувала министрите вмешани во корупциски скандал.
Во едно интервју Ердоган изјави дека медиумите кои го поддржаа воениот удар ќе ја платат цената. На 19 јули регулаторното медиумско тело во Турција им одзеде лиценци за работа на повеќе телевизии и радија кои се сомничат за соработка со Фетула Ѓулен.
Ѓулен кој е некогашен пријател на претседателот Реџеп Таип Ердоган, и кој подоцна му се спротивстави го осуди воениот удар и демантираше каква било поврзаност со него.
Од неуспешниот бунт, турските власти досега суспендираа, приведоа или ставија под истрага над 60.000 војници, полицајци, судии, наставници, административци и други граѓани.