Турција сака да стане членка на Европската Унија до 2023 година, кога слави 100 годишнина од основањето на Републиката и основањето на модерната држава.
„Турската влада сака да се приклучи на Европската Унија до 2023 година“, изјави турскиот амбасадор во ЕУ Селим Јенел.
Тој датум би се совпаднал со прославата на 100 годишнината од турската Република, нагласи Јенел.
„Тоа би било врв за мојата земја тогаш да стане членка на Унијата“, вели дипломатот.
Полноправното членство е важно за Турција, а долгорочно, воопшто не е опција да остане надвор од блокот, додава Јенел.
Турција е кандидат за ЕУ од 1999 година, а преговорите ги почна во 2005 година.
Напредокот на земјата е многу бавен, а после неуспешниот воен удар минатиот месец, уште повеќе е забавен.
На почетокот на месецов Австрија повика на прекин на преговорите на ЕУ со Турција, поради недостаток на демократски стандарди по неуспешниот воен удар.
Австриските и дел од германските официјални лица ја критикуваат турската власт и однесувањето на претседателот Реџеп Таип Ердоган, кои почнаа акции за масовно апсење во земјата.
Турскиот претседател не им остана должен, па одговори како Турција е земја на демократијата и како секоја друга држава има право да се брани откако е нападната.
Европската Унија го проблематизираше и воспоставување на безвизниот режим за граѓаните на Турција, што предизвика реакција во Анкара.
По тој повод турскиот министер за надворешни работи Мевлут Чавусоглу им порача на колегите во ЕУ дека доколку безвизниот режим во октомври годинава не биде укинат за граѓаните на неговата земја, Турција веќе нема да биде обврзана да се придржува на договорот за бегалците и мигрантите.
Тој договор подразбира Турција да им го блокира патот на сите мигранти кои од Блискиот Исток и од Азија преку таа земја тргнуваат кон западна Европа.
На прашањето дали стотици илјади бегалци од Турција ќе тргнат кон Европа ако ЕУ не одобри безвизен режим за Турција од октомври, Чавусоглу за германски Билд рече: „Не сакам да зборувам за најлошото сценарио. Разговорите со ЕУ продолжуваат, но јасно е како сите би требало да ги користиме истовремено сите договори или да ги оставиме на страна“.