Француското „не“ за датум за почеток на пристапните преговори со Северна Македонија и Брегзит се едните од најголемите грешки во историјата на Европската унија, оцени Доналд Туск во неговото интервју за „Гардијан“ по напуштање на функцијата претседател на Европскиот совет.
„Мислам дека е направена голема стратешка и политичка грешка. По толку многу напор и пожртвуваност, особено во Скопје“, рече Туск, кој по заминувањето од челното место во Советот на ЕУ беше избран за нов претседател на Европската народна партија, најбројната политичка групација во Европскиот парламент.
Француското „не“ ги натера водачите во регионот да очајуваат, вклучувајќи го и премиерот на Северна Македонија, Зоран Заев, кој се спротивстави на националистите за да стави крај на долгиот спор за името со Грција, нагласува „Гардијан“.
Тој неповолно го спореди Макрон со Ангела Меркел, која се залага за интеграција на шесте земји од Западен Балкан.
„Нејзината единствена предност е што секогаш беше подготвена да размислува за Европа како целина. И таа беше подготвена да жртвува некаков внатрешен или национален интерес за да ја заштити Европа како целина. Од друга страна, ако сакаме да го третираме Макрон како иден политички лидер на цела Европа, тогаш ни треба човек еден политичар кој се чувствува одговорен пред ЕУ како целина, а не само за Франција“, истакна Туск во интервјуто за „Гардијан“.
Во интервју за „Гардијан“, Туск вели дека Брегзит е „најтажно искуство“ во петте години од неговиот мандат, во бурен период обележан со кризата на еврозоната во Грција, вжештени дискусии за миграцијата и доаѓањето на власт на Доналд Трамп.
Говорејќи за претседателската трка во САД во 2016 година и кампањата за Брегзит, тој рече дека новиот елемент во политиката е „невидена подготвеност да лажеме за речиси се и лагата да се третира како оправдано средство за победа“. Тој рече дека ова „бесрамно“ однесување ќе ги дисквалификува политичарите пред само 10 години.
„Гардијан“ пишува дека Туск смета оти поранешниот британски премиер Дејвид Камерон погрешил со организирањето на референдум на кој „немал шанси да победи“. Туск исто така откри дека утрото по гласањето, тој, сепак, верувал дека одлуката може да биде поништена.
„Мојата намера беше да ја проширам целата дебата во Европа, но и во Велика Британија. Со ова, можеби (секако наивно) се надевав дека резултатот на крајот може да биде различен“, додаде Туск.
Туск го опиша Макрон како „идна надеж на Европа“ и вистински пријател, но рече дека има проблеми со „многу нови идеи и мислења“. Туск исто така се спротивстави на зближувањето на Макрон со Русија, велејќи дека е „дезориентиран“ од овој нов наратив.
„Од друга страна, ако сакаме да го третираме Макрон како иден лидер на цела Европа, политички, тогаш ни треба еден политичар кој се чувствува одговорен пред ЕУ како целина, а не само за Франција“, истакна Туск.
Тој, исто така, рече дека миграцијата е сè уште „најголемиот проблем“ со кој се соочува ЕУ, како резултат на историски голем број луѓе кои бараат азил или работа во Европа. Туск рече дека таа е „моментално нерешлива“, додавајќи: „Оваа нова верзија на миграцијата, нејзината масивност, решеноста на луѓето кои сакаат да дојдат во Европа, е нешто навистина ново, но и постојана ситуација за иднината“, заклучи Туск.