Главните безбедносни и правосудни институции на Косово уапсија жена осомничена за шпионажа на граничниот пункт Јариње со Србија.
Според Специјалното обвинителство, косовската полиција и Косовската разузнавачка агенција (КИА), апсењето е извршено по неколкумесечни истраги. Осомничената Јелена Ѓукановиќ и припаѓа на српската заедница и е вработена во мисијата на Организацијата за безбедност и соработка во Европа (ОБСЕ) во Косово, пренесуваат косовските медиуми.
Таа наводно и давала информации на Српската разузнавачка служба (БИА). На истата и е одреден 48 часовен притвор, додека полициски единици упаднале во нејзиниот стан. Ова е прв случај на апсење за шпионажа во 2025 година. Минатата година беше одбележано апсењето на двајцата косовски албански државјани, Бедри Шабани и Мухарем Ќерими, исто така осомничени за соработка со српската БИА. Според Кривичниот законик на Косово, шпионажата се смета за кривично дело против уставниот поредок и безбедноста, што се казнува со затвор од 5 до 12 години.
Основниот суд во Приштина и одреди триесетдневен притвор на Јелена Ѓукановиќ, осомничена за шпион, која беше уапсена пред два дена на граничниот пункт во Јариње. Судот заклучил дека постои ризик од бегство на обвинетата или дури и да се влијае врз доказите доколку таа биде ослободена.
Организацијата за безбедност и соработка во Европа (ОБСЕ) соопшти дека е запознаена со извештаите за приведувањето на функционерот од оваа мисија од страна на правосудните органи на Косово за шпионажа.
Мисијата на ОБСЕ во неделата на Фејсбук напиша дека се подготвени да соработуваат со властите, бидејќи рекоа дека поради истрагите не можат дополнително да коментираат за овој случај.
„Мисијата на ОБСЕ на Косово е запознаена со извештаите во медиумите во врска со приведувањето на член на мисијата. Ние сме во контакт со нивниот законски застапник и внимателно ја следиме нивната благосостојба во согласност со нашата должност за грижа. Иако Мисијата не може дополнително да коментира за овој случај поради тековните истраги, останува посветена на соработка со надлежните органи“, се наведува во соопштението.
Од ОБСЕ посочија дека се во контакт со релевантните институции, а исто така и со Секретаријатот во Виена „за да се обезбеди усогласеност со соодветниот процес“.
Д. Тахири / ЦивилМедиа