Уапсената потпретседателка на Европскиот парламент, Ева Каили, негира дека примила пари од Катар, изјави еден од нејзините адвокати во Грција, пренесе Радио Слободна Европа (РСЕ).
Каили, еден од 14-те потпретседатели на Европскиот парламент, е осомничена во истрагата за перење пари и корупција во оваа европска институција.
Таа е меѓу четворицата уапсени и обвинети во Белгија изминатиот викенд, поради обвинувањата дека Катар ги опсипал со пари и подароци за да влијае на одлучувањето.
Тие утре треба да се појават пред судот.
„Нејзиниот став е дека е невина, тоа можам да ви го кажам“, изјави за грчката телевизија Михалис Димитракопулос, адвокатот што ја застапува Каили во Грција.
„Таа нема никаква врска со финансирање од Катар, ништо – експлицитно и недвосмислено. Тоа е нејзиниот став“, рече Димитракопулос.
Грција вчера и го замрзна имотот, а Европскиот парламент ја суспендираше.
Катар негираше дека сторил нешто лошо.
Вчера истражителите извршија уште еден претрес во канцелариите на Европскиот парламент во Брисел. Тоа беше 20-та потрага од петокот.
За овој скандал денеска треба да расправаат пратениците во Европскиот парламент.
Извор: Н1