Две лица од Скопје на возраст од 23 и 24 години кои планирале терористички акции биле уапсени на 4 овој месец во регионалната акција за борба против тероризмот, изјави денеска Митко Чавков, директор на Бирото за јавна безбедност.
„За овие лица постојат разузнавачки информации за нивна инволвираност во подготвување на извршување на кривично дело „Тероризам“. По претходно издадени наредби извршени два претреси од кои едниот во Скопје а другиот во село Арачиново при што пронајдени и со потврда одземени беа мобилни телефонски апарати со сим картички, фотоапарати со микро картички, метален боксирач, регистарски ознаки, куршум, компјутерски куќишта, таблет, УСБ и разна документација. За време на извршените претреси пронајдено и обезбедено е 24 годишното лице од Арачиново, додека второто лице е приведено на Косово“, рече Чавков.
Директорот на БЈБ рече дека против лицето уапсено во Скопје поднесена е кривична пријава поради постоење основи на сомнение за сторено кривично дело „тероризам“, а од страна на судија за претходна постапка изречена му е мерка притвор во траење од 30 дена.
Чавков на денешната прес конференција соопшти и дека во вторникот во организирана акција пресекле меѓународен канал за трговија со дрога и заплениле 108,5 килограми марихуана. Дрогата, чија вредност на наркопазарот се проценува на околу 1 милион евра, била со потекло од Албанија, а требало да заврши во Турција.
Во оваа акција биле уапсени четири лица, од кои двајца македонски, еден косовски и еден албански државјанин.
Чавков нагласи дека првоосомничениот бил инволвиран и во случајот со Закир Бекири, познат под прекарот Чауш, кој беше обвинет за фалсификување лични карти и пасоши.
„Заради ваше информирање, истиот беше на извесен начин и во конекција и во случајот што беше поврзан со Чауш, односно со лицето што беше инволвирано со разни криминални активности поврзани со фалсификување најразлична документација. Во таа документација најдовме податоци за фалсификување медицинска документација и за првоосомничениот во овој случај“ , рече Чавков на денешната прес конференција.