Косовската полиција синоќа уапсила неколку граѓани кои во центарот на Приштина, на плоштадот Скендербег палеа српски производи, објави Радио Слободна Европа.
Приштинската телевизија Т7 која директно го пренесуваше настанот пренесе дека меѓу притворените бил и претседателот на навивачите на фудбалскиот клуб Приштина Алберт Кастрати.
И во некои други места на Косово вчера биле палени производи од Србија како реакција на одлуката на косовската влада да ја зголеми таксата за увоз на овие производи од 10 на 100 отсто и да ја забрани продажбата на артикли во кои како земја увозник не е наведено уставното име.
Косовските Срби денеска на пладне ќе организираат мирни едночасовни протести во Косовска Митровица, Грачаница и Штрпце, а на нив ќе биде побарано од меѓународната заедница да ги принуди косовските власти да ја повлечат одлуката.
Претставници на косовските Срби ги известија властите во Белград за планираните собири, нагласувајќи дека не можат немо да ги следат најновите мерки на Приштина.
– Нема да дозволиме децата да немаат основни намирници, изјави градоначалникот на Косовска Митровица Горан Ракиќ, додавајќи дека ситуацијата јужно од Ибар е уште полоша.
Тој истакна дека можно е да има и блокада на патишатата, а протестите ќе се одржат во Здравствениот центар и во Студентскиот центар во Косовска Митровица.