Женската ракометна репрезентација на Македонија ги продолжува квалификациите за СП 2017. Избраничките на селекторот Симе Симевски во јуни ќе играат бараж за мундијалот што догодина ова време ќе се одржи во Германија. „Црвено-црните“ се надминаа себеси во завршниот меч во Торшавн што директно одлучуваше за второто место во групата 3 и со 27:20 го совладаа Исланд. Како лидер заврши Австрија со 4 бода колку што освои и Македонија и Исланд, но исландските ракометарки се елиминирани од македонските за натамошните борби поради поразот во меѓусебниот дуел.
Сара Ристовска и по третпат на турнирот беше најефикасна македонска репрезентативка. Вардаровото крило попладнево „експлодира“ и постигна 10 гола го предводеше националниот тим до триумф во натпреварот да се биде или не. Најголема поддршка во нападот имаше од Георгиевска и Керамичиева кои дадоа по пет.
Ристовска заврши и како лидер на листата на стрелци во оваа фаза од квалификациите. Против Фарски Острови (6), Австрија (8) и Исланд (10) забележа 24 погодоци, еден повеќе од Дијана Сатскаускаите од Литванија и два од Швајцарката Сибил Шерер.