Партијата Нова демократија на премиерот Киријакос Мицотакис води на парламентарните избори во Грција со голема разлика, а по неа е левичарската партија СИРИЗА, предводена од Алексис Ципрас, објавија западните медиуми.
Владејачката конзервативна партија има водство од речиси 41 отсто од гласовите врз основа на над 70 отсто од преброените гласачки ливчиња, наспроти 20 отсто за СИРИЗА.
Социјалистичката партија ПАСОК е трета, со околу 12 отсто од гласовите и 42 пратенички места. Нејзиниот лидер Никос Андрулакис пристигна во седиштето на партијата, опишувајќи ги денешните избори, на кои неговата партија настапи подобро од очекуваното, како „одличен ден“ за демократијата.
Со преброени 71,39 отсто од гласовите, резултатот е следен:
Нова демократија: 40,83 отсто и 145 пратенички места
СИРИЗА: 20,07 отсто и 72 пратенички места
ПАСОК-Движење на промена: 11,82 отсто и 42 пратенички места
Комунистичка партија на Грција: 7,09 отсто и 25 пратенички места
Грчко решение (Hellenic Solution): 4,50 проценти и 16 пратенички места
Останатите партии кои не влегуваат во Парламентот заедно имаат освоено 15,69 отсто.
Иако е во предност, актуелниот грчки премиер веројатно нема да освои доволно места во Парламентот за целосно да формира влада.
Доколку биде потврдено со официјални резултати, Мицотакис ќе мора да бара коалициски партнери за да обезбеди мнозинство во 300-члениот Парламент. Доколку коалициските преговори не успеат, вторите избори би можеле да се одржат кон крајот на јуни или почетокот на јули.
Денешните избори се први во Грција откако нејзината економија престана да биде под строг надзор од меѓународните кредитори кои обезбедија спасувачки средства за време на речиси децениската финансиска криза во земјата.
Гласањето се одржа според новиот изборен закон за пропорционална застапеност, што го отежнува особено на која било партија да освои доволно гласови за сама да формира влада. Но, за следните избори, законот повторно ќе се промени, префрлајќи се на систем кој ја наградува водечката партија со бонус места и ќе и го олесни добивањето на мнозинството пратенички места.
Мицотакис, 55-годишен поранешен банкарски директор образован на Харвард, имаше стабилна предност во анкетите во пресрет на изборите. Но, неговата популарност доби удар по железничката несреќа на 28 февруари, во која загинаа 57 луѓе. Подоцна беше откриено дека железничките станици биле слабо екипирани и безбедносната инфраструктура уништена и застарена.
Владата беше погодена и од скандал со прислушување во кој новинари и истакнати грчки политичари открија шпионски софтвер на нивните телефони. Откритијата ја продлабочија недовербата меѓу политичките партии во земјата во време кога можеби е многу потребен консензус.
Грчката некогаш доминантна социјалистичка партија ПАСОК веројатно ќе биде во центарот на какви било коалициски разговори. Нејзиниот лидер Никос Андрулакис (44) беше во центарот на скандалот со прислушувањето во кој неговиот телефон беше цел на следење.
Но, лошиот однос на Андрулакис со Мицотакис, кого го обвинува за прикривање на скандалот со прислушувањето, значи дека договор со конзервативците би бил тежок. Неговиот однос со Ципрас е исто така лош, обвинувајќи го дека се обидел да ги украде гласачите на ПАСОК.
Г. Т.