Освојувачот на фудбалската Лига на шампиони во 2019 година ќе биде промовиран на „Ванда Метрополитано“, новиот стадион на Атлетико Мадрид. Објектот што чини 240 милиони евра беше отворен во минатиот викенд и има капацитет од 67,600 гледачи. Финалето во елитното натпреварување за сезоната 2018/19 е закажано на 1 јуни со што Мадрид е втор град во историјата, по Лондон, со пет или повеќе изданија на престижниот настан. Досегашните четири меча за титулата се организираа на „Сантијаго Бернабеу“ во 1957 година, во 1969 година, во 1980 година и во 2010 година.
Ова е само една од одлуките од денешниот состанок на Извршниот одбор (ИО) на Европската фудбалска асоцијација (УЕФА) на ко беа одредени градови и стадиони за финални средби и во останатите натпреварувања. Финалето во Лига Европа за сезоната 2018/19 ќе се одигра на 29 мај на Олимпискиот стадион во Баку, Азербејџан, а Суперкупот на стадионот на Бешикташ на 14 август. Завршниот натпревар во женската ЛШ за таа сезона ќе биде во Будимпешта, на стадионот на Ференцварош за што датумот ќе биде дополнително одреден.
Битката за трофејот во тековната сезона во ЛШ ќе се одигра на Олимпискиот стадион во Киев на 26 мај, финалето во ЛЕ ќе биде на 16 мај во Лион додека европскиот Суперкуп е закажан на 15 август на „Ле Кок арена“ во Талин, Естонија.