Европската фудбалска асоцијација (УЕФА) по денешниот состанок на Извршниот одбор (ИО) го претстави новиот проект т.н. „Лига на нации“ што ќе тргне од септември во 2018 година. Во него ќе учествуваат сите 55 нејзини членки, ќе бидат поделени во четири квалитативни групи (Лига А, Лига Б, Лига Ц и Лига Д) и во суштина треба да замени најголем дел од пријателски средби, но ќе има и натпреварувачко значење бидејќи преку неа се планирани четири места на ЕП 2020.
Квалитативните групи ќе бидат изготвени врз база на националниот коефициент од ранг листата што ќе излезе во ноември во оваа година или, поточно, по завршување на европските квалификации за Светското првенство во Русија.
Во секоја од групите Лигите (А, Б, Ц и Д) ќе бидат формирани четири групи (1, 2, 3 и 4) со три до четири селекции. Лига А ќе ги опфати 12 најдобрите на континентот (четири групи по три репрезентации), во Лига Б ќе се најдат, исто така, 12 тима (четири групи по три репрезентации), Лига Ц ќе брои 15 (три групи со четири репрезентации и една со три) и во последната Лига Д ќе има 16 (четири групи по четири репрезентации).
Доколку Лигите би се формирале денеска, Македонија би била во најслабата Д конкуренција со национални тимови како Лихтенштајн, Луксембург, Фарски Острови, Косово, Гибралтар, Сан Марино, Андора, Казахстан, Естонија, итн. Најверојатно во неа и ќе заврши со оглед на рејтингот што во моментот го ужива на УЕФА и на ФИФА ранг листите.
Четири билети за ЕП 2020 преку новиот репрезентативен проект
При презентацијата на новиот проект од УЕФА најавија дека најдобрите од секој ранг ќе напредуваат во повисок, а најслабите ќе назадуваат во понизок. Четири тима преку Лигата на нации ќе обезбедат право на учество на ЕП 2020.
„Националните федерации и селекторите на репрезентациите се пожалија дека пријателските мечеви повеќе наштетуваат одошто им помагаат на нивните тимови. Лигата на нации нуди повеќе квалитетни и натпреварувачки средби, а за селекциите од среден или најслаб рејтинг е идеална прилика за билет за Еуро“, порачаа од УЕФА.
Во плеј-офот за четирите места на ЕП 2020 ќе учествуваат 16 репрезентации. Тоа се однесува на победниците во секоја од четирите групи во четирите Лиги. Ако со место во плеј-офот се стекне тим што осигурал пласман на ЕП преку регуларните квалификации, тогаш правото е пренесува на најдобриот по него во Лигата на нации.
Континенталниот турнир во 2020 година во 13 града, полуфинале и финале на „Вембли“
Натпреварите по групи во Лигата на нации ќе се одиграат во септември, во октомври и во ноември во 2018 година кога се термините и за редовните квалификации. Секој тим е замислено во тие месеци да има по еден квалификациски настап за ЕП 2020 и по еден во новото натпреварување на УЕФА.
Европското првенство во 2020 година за првпат ќе се одигра во 13 града ширум континентот за одбележување на 60 годишнината од првиот турнир.
Домаќини на натпреварите ќе бидат Баку (Азербејџан), Брисел (Белгија), Копенхаген (Данска), Минхен (Германија), Будимпешта (Унгарија), Даблин (Република Ирска), Рим (Италија), Амстердам (Холандија), Букурешт (Романија), Санкт Петербург (Русија), Глазгов (Шкотска) и Билбао (Шпанија). Полуфиналните мечеви и големото финале ќе бидат на „Вембли“ во Лондон.