Барселона домаќин на Манчестер Сити во дербито на вечерта во фудбалска Европа
Фудбалска „војна на милионите“ вечерва во Лигата на шампиони. На „Камп Ноу“ гостува Манчестер Сити, на „Камп Ноу“ се враќа Пеп Гвардиола, „Камп Ноу“ е сцената од која се очекува да понуди 90 минутно уживање за неутралните вљубеници во најважната споредна работа во светот.
Двете екипи се преполни со фудбалски легионери што може да одговорат на секаква замисла, двата тренера имаа материјал за одржување на концепцијата на тотален фудбал, на офанзива, на победнички дух и менталитет. Едниот ја измисли популарната „тика-така“, другиот ја наследи. И Гвардиола и Енрике со меѓусебен респект и за играчите што ги предводат.
„Тој е најдобар тренер на светот“, рече Енрике во најавата за спектаклот на што не остана должен ниту Гвардиола кој возврати:
„Барселона под водство на Луис е подобра од мојата Барселона“.
Барселона во дербито влегува со победа над Депортиво ла Коруња со 4:0 во Примера во изминатиот викенд, Сити слета во Шпанија со реми (1:1) против Евертон во Премиерлигата и два промашени пенала на Де Брујн и Агуеро.
„Пеп е навистина добар пријател. Го обожувам неговиот напаѓачки менталитет. Но, ова нема да биде меч меѓу тренери. Фудалерите се тие што ќе решаваат за победа или пораз. Влијанието на Пеп во играта на Манчестер Сити е видливо. Секогаш е добра вест дека Меси се враќа. Прави шанси, постигнува голови. Колку повеќе е инволвиран во играта, толку Барселона е подобра“, коментира Енрике кој нема проблеми со повредени или суспендирани играчи.
Гвардиола нема да смета на повредените Сања и Делф. Но, има Пеп поединци во соблекувалната што можат адекватно добро да се справат со предизвик од секаков вид.
„Кога првпат се запознавме како фудбалери, беше лесно да се воочи дека Луис е специјален. Директен е, чесен, искрен и голем работник е. Веќе постигна доста успех, а го чека уште многу во иднина. Тој направи повеќе со тимот на Барселона од времето кога јас бев главен овде“, истакна Гвардиола.
Шпанецот на клупата на „граѓаните“ вели дека вечерашниот дуел ќе биде одличен тест за неговата екипа. Но, ремито со Селтик, вели Гвардиола, го ставаат Манчестер Сити во позиција да бара бод во Барселона.
„Среќен сум што Меси е фит и ќе може да настапи. Не му требаат ногу шанси да постигне гол. Ќе мора да бидеме внимателни. Што е однесува до нас, сакам да одиграме добро во двата правца. И во одбрана и во напад“, најави менаџерот на Сити.
Лига на шампиони
Група А: Арсенал – Лудогорец, ПСЖ – Базел
Група Б: Наполи – Бешикташ, Динамо Киев – Бенфика
Група Ц: Барселона – Манчестер Сити, Селтик – Борусија Менхенгладбах
Група Д: Ростов – Атлетико Мадрид, Баерн Минхен – ПСВ Ајндховен
Мечевите почнуваат во 20.45 часот