Украинските сили ноќеска ја нападнаа руската воздухопловна база во Енгелс и рафинерија за нафта во Саратовската Област, потврди Генералштабот на Украина по претходните информации од каналите што ги следат воените дејства.
Украинската војска соопшти дека погодила „цел“ во руската воздухопловна база Енгелс, при што избувнал пожар, но не прецизираше што точно било погодено. Во базата се стационирани стратешките бомбардери Ту-95МС и Ту-160, кои Москва ги користи за ракетни напади врз Украина.
Пожар наводно избувнал и во рафинерија во блискиот руски град Саратов, откако објектот бил погоден со украински беспилотни летала. Генералштабот соопшти дека украинските сили го погодиле и складиштето за нафта „Људиновскаја“ во Калушката Област.
Украинскиот претседател Володимир Зеленски ги потврди нападите во објава на социјалната мрежа „Икс“.
Рафинеријата во Саратов е една од најголемите во рускиот регион Поволжје. Таа годишно преработува околу седум милиони тони сурова нафта и го поддржува рускиот воено-индустриски комплекс.
Според гувернерот на Саратовска Област, Роман Бусаргин, во нападите загинале двајца, а била оштетена цивилна инфраструктура во двата града. Украинската војска не ги коментираше овие тврдења.
Генералштабот пријави и напад врз руски објект за беспилотни летала во близина на Навља, во Брјанска Област, кој се користел за складирање, подготовка и лансирање дронови.
Во местото Новосемејкино, во Самарска Област, избувнал пожар во магацин на компанијата „Вајлдберис“, откако објектот бил погоден, објави рускиот телеграм-канал „Егзиленова плус“.
Гувернерот на Самарска Област, Вјачеслав Федоришчев, соопшти дека воздушниот простор над регионот бил затворен поради опасност од напад со беспилотни летала.
Украина во последните недели ги засили нападите врз руски логистички, нафтени и воени објекти, меѓу кои центри на „Вајлдберис“, рафинерии и фабрики.
Киев тврди дека целта е слабеење на руските воени капацитети. Паралелно, Москва продолжува да напаѓа украински градови и цивилна инфраструктура, при што има загинати и повредени.