Европскиот суд на правдата го отфрли барањето од Унгарија и Словачка, поддржано од Полска, за отфрлање на квотите за примање на мигранти од Африка и од Блискиот Исток.
Унгарија не прифати ниту еден барател на азил, откако пред две години беа воведени задолжителните квоти. Тие беа обид да се олесни притисокот врз земјите кои беа први на удар на мигрантите, Грција и Италија.
Помалку од 28.000 луѓе беа распоредени врз основа на квотите, наместо 160.000 баратели на азил кои беа предвидени кога квотите беа договорене во септември 2015 година.
Официјалните претставници на ЕУ инсистираа од самиот почеток дека квотите се обврзувачки за сите земји-членки, без оглед дали гласале за тоа или не. Унгарија, Словачка, Чешка и Романија се спротивставија на квотите.
Ова е прашање што ја подели Европската унија.
При поднесувањето на предметот до Судот на правдата, Унгарија и Словачка тврдеа дека има процедурални грешки и дека квотите не биле соодветен одговор на мигрантската криза.
Нивниот случај беше одбиен со одлуката на ЕСП денеска.
-Судот ги отфрли постапките на Словачка и Унгарија против привремениот механизам за задолжително преместување на барателите на азил, се вели во соопштението.
-Овој механизам, всушност, придонесува Грција и Италија да се справат со влијанието на миграционата криза во 2015 година и е пропорционален, се вели во одлуката.
Одлуката, иако очекувана, беше одложувана преку две години, додека ЕУ го преживуваше Брегзит, безбедносните закани и меѓународните предизвици.
Речиси 2 милиони мигранти пристигнаа во ЕУ од 2014 година, со голем бран миграција во 2015 година. Со договорот за затворање на рутата од Турција до Грција, овој бран е запрен, а беа вложени и многу напори за поддршка на Либија за да се спречи заминување за Италија.