Унгарија повеќе не може да се смета за целосна демократија, се вели во соопштението на Европскиот парламент по усвојувањето на извештајот денеска. Парламентот заклучи дека ситуацијата „се влоши толку што Унгарија стана изборна автократија“.
„Генерално, европскиот парламент изразува жалење што недостатокот на решителна акција на ЕУ придонесе за рушење на демократијата, владеењето на правото и основните права во Унгарија и претворање на една од нејзините земји-членки во хибриден режим на изборна автократија“, се вели во извештајот.
„Постои растечки консензус меѓу експертите дека Унгарија повеќе не е демократска држава“, се додава во извештајот.
Во својот извештај, членовите на парламентот наведоа низа аргументи, вклучително и за функционирањето на изборниот систем на земјата и независноста на судството. Тие, исто така, изразија стравувања за академските и верските слободи, како и за правата на ранливите групи, вклучувајќи ги „етничките малцинства, ЛГБТ, бранителите на човековите права, бегалците и мигрантите“.
Извештајот, кој беше усвоен со 433 гласа „за“, 123 „против“ и 28 воздржани, го повикува Европскиот совет и Европската комисија „да посветат поголемо внимание на системското разбивање на владеењето на правото“ во Унгарија.
Особено, Парламентот на ЕУ ја повикува Комисијата да ги запре средствата на Унгарија од ЕУ.
Некои десничарски европратеници го критикуваа извештајот, велејќи дека тој е „заснован на субјективни мислења и политички пристрасни изјави и одразува нејасни грижи, вредносни проценки и двојни стандарди“.
„Овој текст е уште еден обид на федералистичките европски политички партии да ја нападнат Унгарија и нејзината христијанско-демократска, конзервативна влада од идеолошки причини“, велат тие.
Наведувајќи ги ризиците од корупција, Европската комисија се очекува да препорача кон крајот на оваа недела да се суспендираат милијардите наменети за Будимпешта од заедничкиот буџет на блокот од 1,1 трилиони евра за 2021-2027 година, според Ројтерс.
Тоа ќе биде прв ваков потег на ЕУ според нејзината нова финансиска санкција наречена „пари за демократија“ и договорена пред две години токму како одговор на унгарскиот премиер Виктор Орбан, како и неговите сојузници во Полска, кои ги загрозија либералните демократски начела во внатрешноста на ЕУ блокот.
Европската комисија веќе блокираше околу 6 милијарди евра за Будимпешта од посебниот пакет за економски стимулации за Ковид, наведувајќи ги недоволните заштитни мерки во јавните набавки на Унгарија.
Средствата вредни колку една десетина од унгарскиот БДП би можеле да бидат загрозени доколку другите членки на ЕУ ја одобрат препораката од Комисијата. (Си-Ен-Ен)