Петар Наумоски свика вонредно Собрание на Македонската кошаркарска федерација (МКФ) на 15 декември. Го предложи самиот како прв човек на Управниот одбор (УО) по отфрлање на иницијативата на 12 клуба од минатата недела како нелегитимна. Образложи и зошто:
„Иницијативата ја проследивме до Агенцијата за млади и спорт со цел да видиме колку клубови имаат решение за дејност спорт. Притоа е утврдено дека таков документ имаат 44 од вкупно 60. Во тие 16 што немаат се и три клуба потписници на барањето за вонредно Собрание. Тоа се Охрид, Радовиш и Кожувчанка. Без нив и субјектот што доцнеше се доаѓа до бројката од 10 клуба, а тоа не е една третина од членовите на Федерацијата. Некој изгледа не го прочитал Статутот“, рече Наумоски на состанокот на УО на МКФ и додаде:
„Затоа, јас, како претседател предлагам да избегнеме ново собирање потписи за нова иницијатива и да прифатиме одржување на вонредно Собрание што ќе го свика управниот одбор“.
Наумоски, кој процедурата за собирање потписи за вонредно Собрание на МКФ, ја оцени како грешка во чекори и на претставници од Иницијативниот одбор (ИО) им порача дека треба да прават разлика од членки на федерацијата и членки на Собранието.
По завршување на расправата за термин за вонредно Собрание беше предложено во викендот пред нас да стартува сезоната во домашното првенство. Како раководство на чие чело е порака дека „од одговоност и од закани за наша смена не бегаме“, но кошарката не смее да трпи и мора да се игра. Останува отворена дилемата дали шампионатот и официјално ќе почне или викендот ќе донесе и ново пролонгирање на стартот на сезона? – Она што е извесно по денешниот УО е поместување на рокот за плаќање на зголемените суми за лиценци на странските кошаркари до наредниот петок.