Нова управа за подобро утре на „Сан Сиро“. Грогираниот италијански великан продолжува со ново раководство по денешнета смена на кинескиот бизнисмен Ли Јонгхонг и именување на Паоло Скарони за прв човек на „росонерите“. Промената доаѓа како последица на најава за преземање на клубот од американскиот инвестициски фонд „Елиот“ кој за почеток ќе вложи 50 милиони евра. Отказ доби и спортскиот директор Марко Фасоне и уште тројца Кинези кои беа членови на досегашниот управен одбор.
„Почнува нова ера во Милан. Наскоро ќе биде назначен и спортски директор како и план за враќање на екипата во Лигата на шампиони“, се вели во соопштението на седумкратниот европски првак.
Милан во јуни доби двегодишна забрана за настап во европските фудбалски натпреварувања поради кршење на правилото за финансиски ферплеј. „Росонерите“ ја обжалија таквата одлука во Судот за спортска арбитража во Лозана, пресудата беше во нивна корист, па вчера повторно станаа учесници во УЕФА Европа лигата за сезоната 2018/19.
Тимот од „Сан Сиро“ е четири години без настап во Лигата на шампиони додека последното „Скудето“ во Серија А го освои во 2011 година.