Управниот суд денеска треба да се изјасни по дел од тужбите поднесени на одлуките на ДИК за гласањето во првиот круг од локалните избори од 15 октовмри.
Во текот на вчерашниот ден на јавни седници разгледани се 19 од вкупно поднесените 28 тужби од партиите против решенијата на Државната изборна комисија (ДИК) за приговорите за првиот круг од локалните избори што се одржаа во неделата.
Од нив 16 тужби се од ВМРО-ДПМНЕ, две од ТМРО и една од Левица. Од Судот информираат дека одлуките за 19-те разгледани тужби ќе бидат објавени во текот на денов по нивното техничко изготвување.
Управниот суд денеска треба да ги разгледа и преостанатите тужби. Судечките совети на Управниот суд по овие тужби треба да се изјаснат 48 часа од нивното поднесување. По тужбите одлучуваат пет судечки совети составени од по пет судии од Управниот суд избрани со жрепка. Тужбите електронски им се распоредуваат на судиите, а одлучувањето ќе биде на јавни седници.
Во меѓувреме тече кампањата за вториот круг од изборите. Вториот круг од локалните избори е на 29 октомври.