Олександар Урбанович, претседател на Здружението на Украинците ,,Лесја Украинка”, денеска се обрати по повод „масовните ракетни и беспилотни напади врз Украина“.
„Повеќе од 100 луѓе, цивили станаа жртви на овие напади. Луѓе коишто се спремале или оделе на работа, носеле деца во градинки и на училиште, луѓе кои оделе на лекар или да пазарат во трговски центар. Невини животи, уништени судбини, украдена иднина, човечки страдања“, рече Урбанович, меѓу другото, во своето обраќање за јавноста.
Тој кажа дека, при немилосрдниот руски напад, еден од најголемите од почетокот на инвазијата врз Украина, уништени се училишта, породилишта, трговски центри, домови и деловни простории. Понатаму, првиот човек на здружението на Украинците, посочи дека веќе целиот свет гледа дека, како што ги нарече, „руските терористи нема да запрат пред ништо и дека нивната цел е да ја уништат украинската нација.“
„Руските злосторства мора да бидат осудени, руските терористи мора да одговараат за бројни убиства, киднапирања на деца, терор“, рече Урбанович и повика на зголемување на воена и техничка поддршка, животот на цивилите зависи од навремената помош!
„Мора да станете свесни дека, при најлошото сценарио, Русија нема да се задоволи со Украина. Доколку не ја спречиме, на ред ќе дојдат и други европски земји. Московскиот монструм никогаш нема да се насити!“ – посочи Урбанович на крајот од своето обраќање, а потоа, заедно со присутните, во еден глас извикаа:
„Украина ќе победи! Слава на Украина! Слава на хероите!“
Марија Тодоровска