Основното јавно обвинителството веќе три месеци води истрага за сообраќајката во Кисела Вода во која Дејан Митровски – Урко усмрти 22 годишен мотоциклист.
Додека да се чека исходот и одлуката на обвинителството дали ќе има обвинение за Митровски, тој во меѓувреме се закити со уште една спортска функција – стана претседател на Кик боксинг федерацијата на Македонија. Урко, кој воедно е и селектор на репрезентацијата, едногласно е избран на Вонредно собрание, откако претходно оставка си поднесе досегашната претседателка Александра Неделковска.
„Го сакам кик боксот, ќе работам чесно и достојно во согласност со Статутот на КБФМ за доброто на кик боксот и за негово издигнување на уште повисоко ниво. Веќе работиме на подобрување на меѓуклупските и меѓутренерските односи, за сите заедно да дадеме свој придонес кон зајакнување на колективот меѓу клубовите во федерацијата кој ќе вроди со продуцирање на поквалитетни натпреварувачи и постигнување на уште поголеми резултати, како на домашни, така и на меѓународни првенства“,- рече новиот претседател Дејан Митровски – Урко по изборот за прв човек на федерацијата.
Од Јавното обвинителство на Марко Зврлевски на прашањето на НОВАТВ: „До каде е истрагата за сообраќајната несреќа“, оттаму денеска кусо одговорија.
„ Во Основното јавно обвинителство Скопје се очекува пристигнување на Извештај од наредено сообраќајно техничко вештачење за настанатата сообраќајна несреќа. Потоа, по разгледување и анализа на прибраниот материјал, ќе биде донесена одлука за натамошно постапување. “, соопштија од Јавното обвинителство.
Сообраќајната несреќа се случи на 27 јули во населбата Кисела Вода кај Рампа, во која Митровски со автомобил „БМВ“ удри во 22 годишен мотоциклист. Момчето беше тешко повредено и во кома, а на први август почина.
Дури по девет дена од сообраќајката, на 4 август МВР до Основното јавно обвинителство ја достави кривичната пријава против Урко, поранешниот шеф на обезбедувањето на екс премиерот Никола Груевски. Тој се товари за кривичното дело „Тешки дела против безбедноста на луѓето и имотот во сообраќајот“. Според Кривичниот законик, за тоа предвидена е казна затвор од една до десет години.
Тој го штитеше Груевски цели 15 години, почнувајќи од 1999 година кога тој беше избран за министер за финансии, а во 2006 кога ВМРО-ДПМНЕ ја освои власта, Урко стана телохранителот број 1 на Груевски. Во 2014 беше суспендиран од работната позиција – шеф на обезбедувањето на Груевски, но се уште работи во Шестата управа во МВР. Тој истовремено е посветен и на неговиот семеен бизнис, клубот за вежбање „Магнус“.