Уставниот суд денеска ја укина одлуката на Советот од 2014 година за Деталниот урбанистички план на скопската општина Центар.
„Судот оцени дека одлуката за ДУП на општина Центар е спротивна на Законот за локална самоуправа, поточно со членот 62 став 2 од овој Закон. Уставниот суд оцени дека не било обезбедено потребното мнозинство од 12 гласа „за“, како што предвидува Законот“, изјави по денешната седница портпаролката на Уставниот суд, Христина Беловска .
Иницијативата до судот е потпишана од граѓанин кој живее на една од засегнатите локации. Судијата известител Осман Кадриу предложил да се отфрли иницијативата но не добил поддршка од мнозинството судии кои сметале дека сепак треба да се укине оспорениот ДУП а тој најавил издвоено мислење.
Согласно денешната одлука на Уставниот суд, општина Центар нема да може да издава одобренија за градби за конкретните локации кои се опфатени со Деталниот урбанистички план, бидејќи тој ДУП не постои од денот кога ќе биде објавена одлуката на Судот во Службен весник, вели портпаролката Христина Беловска.
Општина Центар нема да може да издава одобренија за градби на подрачјето на Капиштец, Завод за медицинска рехабилитација, Старо Водно, Долно Водно, Мало Курило и Цвеќара.
Оние што во меѓувреме добиле дозвола за градење ќе можат да градат со оглед на тоа што одлуката на Уставен е укинувачка а не поништувачка. Ова е втор пат Уставниот суд да одлучува по слична иницијатива, и поранешниот градоначалник на општина Центар го оспори овој ДУП но поранешниот состав на уставни судии сметаат дека судот е ненадлежен.