Најмалку девет лица го загубија животот, а 50 се повредени при налет на камион меѓу штандови на божиќен саем во Берлин. Властите се претпазливи во односот кон јавноста и избегнуваат да кажат дека се работи за терористички акт иако се упатува на такво нешто. Медиумите, пак, апелираат да не се создава паника и упатија до граѓаните да се воздржат од излегување на улиците.
„Нема шанси ова да не е тероризам. Камионот без кочење влета во топлата луѓе“, коментираат сведоци на ужасните сцени што потсетуваат на терористичкиот напад во Ница оваа година кога, исто така, камион влета во маса народ пришто однесе 80 човечки животи.
Социјалните мрежи се преплавени со фотографии од настанот. Засега нема информации за идентитетот на жртвите, полицијата порача дека ситуацијата е под контрола. Еден од напаѓачите е уапсен на 100-тина метри од возилото, совозачот загина на лице место.
„Луѓето вриштеа, фрлија се што носеа со себе и очајнички се обидуваа да го избегнат движењето на камионот. Не знаевме што се случува. Камионот само сврте кон масата луѓе. Видов како се движи низ саемот, под неговите тркала останаа неколку лица. Ситуацијата беше луда, полицијата брзо пристигна и ги евакуира посетителите на Божиќниот саем“, раскажува сведок на немилиот настан.
Германската полиција за агенцијата „ДПА“ потврди дека овој чин го третира како терористички напад. На граѓаните им е советувано да останат во своите домови.
„Отидoвме на саемот да уживаме во божиќните украси и греано вино. Одеднаш слушнавме силен удар. Од нашата лева сттрана почнаа да паѓаат украси и во еден момент видовме долг кампион како се пробива низ штандовите и луѓето“, вели Ема Раштон, еден од очевидците на настанот, за „Си-Ен-Ен“.
И таа, како и останатите што дадоа изјави за медиуми, смета дека ситуацијата воопшто не изгледала како несреќен случај.
„Возеше со голема брзина, можеби околу 80 километри на час. Штандот на кој бевме целосно е уништен. Кога излеговме од саемот видовме луѓе облеани во крв. Беа насекаде. Сакавме да помогнеме, но дојде полиција и медицински екипи, а ние се засолнивме во хотел“, додаде Раштон.
Камионот бил регистриран на фирма во Полска. Нејзиниот сопственик го изнајмил на двајцата возачи со кои, за германските медиуми, изјави дека загубил контакт по 16 часот попладнето.
„Њујорк пост“: Исламска држава ја презеде одговорноста за трагедијата
Исламска држава ја презеде одговорноста за вечерашната трагедија во Берлин во која камион влета на Божиќен саем. Како што пренесува „Њујорк тајмс“, таква порака се појавила на профили на социјалните мрежи што се поврзани со терористичката организација.
