Ситуацијата во Македонија е многу сериозна, но сè уште не е крајно алармантна, изјави денеска Иво Вајгл, член на Европскиот парламент за Агенција Анадолу.
„Најкарактеристична е, сепак, изјавата која ни ја даде Никола Груевски, претседателот на ВМРО-ДПМНЕ, кој сподели дека тој ќе оди до крај, бидејќи не сака да оди во затвор. Ако тоа е мотивот, тоа значи дека долго време нема да има компромис“, вели Вајгл.
Европратеникот вели дека оние кои имаат мнозинство, предводени од СДСМ, сега имаат уште една опција и додава дека главните настани се на улиците.
„ВМРО-ДПМНЕ бескомпромисно ги повика луѓето на улица и тие парадираат, а и они со нив. Се плашам дека ова нешто на улиците може да ескалира, но не може да се предвиди тоа. Не сакам да зборувам за најмрачните сценарија, сепак, таму се можни. Секој ден се повеќе се поттикнува омраза против Албанците. Најверојатно другата страна го прави истото. Албански јазик не знам, па не можам да ги следам нивните медиуми“, вели Вајгл.
Тој додава дека знак на толеранција е договорот што го постигнале пратениците за Комисијата за избори и именувања.
„Секој ден нешто се случува. Сега тие во парламентот се согласија за Комисијата за изборни именувања. Оние кои треба да формираат влада дозволија претседателот на Комисијата да биде од редовите на ВМРО-ДПМНЕ, така што ова е знак на толеранција“, изјави Вајгл.
Претходно Вајгл во интервју за НОВА ТВ изјави дека ако не се опорави ситуацијата во државава, можно е Македонија да се соочи со санкции.