Вакцините и фрижидерите се „на готовс“, а освен лекарските тимови, забрзани подготовки и последни проверки на возилата прават и возачите кои од понеделник ќе треба да поминат и повеќе од 50 километри на ден за да стасаат и до најодалечените жители во селата коишто сакаат да се заштитат од ковид-19. А во селата деновиве е посебна приказна – се чистат и дотеруваат училиштата и амбулантите, се лепат плакати во месните заедници со кои населението се информира зошто е добро да се вакцинира… А главно место за вакцинација, ако нема посоодветен пункт, сепак ќе биде сред село…секако под дебела сенка, за лекарите да немаат и дополнителна работа.
Во вакви услови се подготвува теренската вакцинација против ковид-19 која во целата земја стартува в понеделник, на 12. јули, во организација на здравствените домови од целата земја.
Во охридско пет села први на листата
Освен во Здравствениот дом во Скопје, и во многу други градови списоците се веќе подготвени. Во Охрид почнуваат со Подмолје чии жители први ќе се вакцинираат, а завршуваат на 23. јули со Пештани, Трпејца, Љубаништа.
– Програмата за теренска вакцинација е веќе пуштена на вакцинација.мк, а на 12. јули отсабајле еден тим тргнува за Подмолје, па за Оровник, Горенци, Требеништа и Волино. Во овие пет села в понеделник ќе ги вакцинираме заинтересираните жители, еве се слушаме со месните заедници. Печатиме и информативни материјали преку кои мештаните ќе бидат известени за тоа дека на лице место ќе може да се заштитат од ковид-19. Некаде ќе вакцинираме во основно училиште, а ако селото има амбуланта, како во Белчишта, тогаш таму ќе биде пунктот. Со еден тим ќе ја почнеме теренската имунизација, а секако ќе ротираат и лекарите и медицинските сестри, бидејќи ќе се поминува голема километража – изјави за НоваТВ д-р Ајсел Зејноска, директорка на Здравствениот дом во Охрид.
Вакцини ќе стасаат и до Велестово, но и до далечните Дебарца, Мраморец, Издеглавје, но и до селата од другата страна накај границата со Албанија, во Трпејца, Љубаништа…
Во врска со тоа ќе може ли да „боцне“ и жител од друг град којшто се задесил дента во селото, д-р Зејноска вели:
– Засега вакцинацијата се планира за мештаните, а инаку нема проблем – кој друг сака, иако е од друг град, слободно нека дојде да прими вакцина во нашиот здравствен дом во Охрид – вели д-р Зејноска.
А охриѓани од понеделник ќе можат и без закажување да се вакцинираат против ковид-19, како и жителите на другите градови во земјата.
Масовната ревакцинација во модуларната болница во Охрид ќе се одвива од 19 до 31 јули, а според д-р Зејноска, продолжува редовната вакцинација во пунктот во Здравствениот дом.
Почнуваат со вакцините на „Синовак“
И во велешкиот Здравствен дом привршуваат подготовките за теренската вакцинација.
– Многу села се на списокот, а ќе се оди секако и до најдалечните – Горно Јаболчиште и Ореше, до каде има околу 50 километри. Подготвивме и распоред, а на терен од 12. јули до 6. август, ќе оди по една екипа, и тоа истите тимови коишто бевме за вакцинација и во спортската сала. Но ќе мора да се менуваме, а од 9. август ќе почнеме да даваме втора доза во истите села – ни рече д-р Марина Тодоровска, координаторка за вакцинација во домот во Велес.
Таа ни откри со која вакцина ќе се заштитат жителите во велешко.
– Почнуваме со вакцината на „Синовак“, ја има во големи количества, веќе е во шприц и не бара растворање и може веднаш да се аплицира, многу е лесна. Преку месни заедници ги известуваме мештаните за тоа дека од понеделник ќе може да се вакцинираат. Очекуваме голем одзив но во тоа ќе се увериме на терен во селата. Некаде ќе вакцинираме во амбуланти, некаде во училишта или сред село! Има села со повеќе население, како Јаболчишта, каде има неколку илјади жители, а има и села со мал број, со само десет луѓе! Првите село каде почнуваме в понеделник се Бањица, Отиштино, Раковец, Бусилци, Еловец, на 13. јули сме Дреново, Долно и Горно Јаболчиште, па до 6. август продолжуваме како што е планирано по распоредот – вели д-р Тодоровска.
Во спортската сала „Младост“ во Велес до денеска вакцинирани се 13.500 граѓани, а претходно, во пунктот во Здравствениот дом 1.500 лица. Од вкупно околу 15.000 вакцинирани, две третини примиле прва доза, а една третина се вакцинирале и со втора доза.
Тимовите кои од понеделник почнуваат со теренската вакцинација во целата земја се надеваат дека фрижидерите со коишто ќе ги пренесуваат вакцините ќе ги враќаат комплетно испразнети во здравствените домови.
Љубица Балабан