Рома се оправда како фаворит и славеше над Емполи со 2:1 во последниот натпревар од 27 коло во Серија А што воедно беше и прв по враќање на Клаудио Раниери на кормилото.
Ел Шарави погоди во деветтата минута за водство на римјаните, но нивната радост траеше кратко. Три минути подоцна сопстевната мрежа ја затресе Жоан Жезус за израмнување на 1:1. До паузата, домашните, сепак, успеаја до нова предност со голот на Патрик Шик во 33. минута и резултатот на „Олимпико“ остана непроменет до крај.
Рома во финишот се соочи со проблем што, за нејзина среќа, не се одрази врз конечниот исход. Најпрво остана со играч помалку по исклучувањето на Алесандро Флоренци во 80. минута, а ВАР системот ја спаси од ново израмнување во 88. минута. Раде Круниќ реализира за Емполи, а по реакцијата на римјаните и прегледувањето на ВАР снимката, главниот судија Мареска виде игра со рака и го поништи голот.
„Волчицата“ е петта на табелата во Серија А со 47 бода, три повеќе од Торино, но и три помалку од Интер и во наредното коло ќе гостува кај тимот на СПАЛ.