Сребреница е најтрагичен настан во Европа од Втората светска војна, нагласи еврокомесарот за проширување на Европската Унија (ЕУ), Оливер Вархеји на денешната видео-конференција по повод одбележувањето на 25 години од злосторствата во Сребреница и посветена на сеќавање, помирување и изградба на заедничка иднина на Западен Балкан.

„Тој настан продолжува да нè прогонува и да нè потсетува на заедничката одговорност за да спречиме никогаш повеќе да не се случи геноцид“, посочи Вархеи.

Еврокомесарот повика на одговорност и задоволување на правдата, истакнувајќи оти сите кои се одговорни за масакрот, ќе мора да се соочат со последиците.

„По 25 години поважно од кога било е да ставиме крај на неказнивоста на сторителите на воени злосторства“, наведе Вархеи.

Еврокомесарот посочи и дека сите обиди за прекројување на историјата се неприфатливи, а политичките лидери имаат одговорност да поттикнуваат помирување, а не националистички наративи кои ги продлабочуваат недовербата, го зголемуваат стравот и омразата.

„Правото на живот и почитување на човековото достоинство, слобода, демократија и еднаквост се во центарот на ангажирањето на целиот Западен Балкан на патот кон ЕУ“, истакна Вархеји.

Во периодот од 11 до 23 јули во 1996 година, припадници на војската на Република Српска, под команда на генерал Ратко Младиќ, убија околу 8.000 босански муслимани, претежно момчиња и мажи на возраст од 12 до 77 години.