Јоргос Василијадис, заменик министер за спорт во грчката Влада, порача дека е подготвен и за „Грегзит“ за смирување на ситуацијата на фудбалската сцена во земјата. А, такво сценарио би значело суспендирање на националниот тим и клубовите од сите натпреварувања под капа на УЕФА и на ФИФА.
Со одлуката на Владата на јужниот сосед, фудбалскиот шампионат е прекинат на неодредено време по скандалозното однесување на газдата на ПАОК, Иван Савидис, кој во неделата си дозволи луксуз да влета во терен со пиштол на појас со намера да се пресмета со судиите по мечот со АЕК. Револтот кај него се однесуваше за поништениот гол за победа на неговата екипа.
„Ако не бидат преземени обврски за создавање на нова регуларна рамка ќе дојдеме до крај на грчкиот фудбал. Нема да ризикуваме со јавниот ред и безбедност. Ајде да направиме Грегзит во фудбалот, не ми е грижа. Мора да се прифатат казни и за изјави што разгоруваат страсти. Сите иамме одговорност“, изјави Василијадис во разговор за грчка „Газета“.
Грчкиот заменик министер за спорт е мета на критики во јавноста која бара негова оставка иако тој негира дека и државата правела грешки за доаѓање до ситуацијата во која западна Суперлигата.
„Ги повикавме сите релевантни фудбалски организации да преземат одговорност за пронаоѓање на решение. Не сум министер за фудбал туку за спорт. Досега се залагав за носење на одлуки преку редовните судови на што УЕФА се противеше. Се досега“, додаде Василијадис.
За непромисленото влегување на тревникот на стадионот „Тумба“ во неделата, тој очекува висока парична казна за Иван Савидис.