Вечерва, во рамки на 46-то издание на Младинскиот отворен театар (МОТ), се три претстави во изведба на „Локомотива – Скопје“, Центар за нови иницијативи во уметноста и културата.

Станува збор за премиера на „Силата на С” на Александар Георгиев  (С. Македонија, Бугарија и Шпанија), „Поезис на себството“ на Снјежана Премуш и Рок Вевар (Словенија) и „Танцувај, танцувај, инаку сме изгубени“ („DOWL“) на Соња Преград (Хрватска).

„Силата на С“ е во авторство, режија и кореографија на Александар Георгиев во соработка со Жана Пенчева од Бугарија и Дарио Барето Дамас од Шпанија. Улогите ги толкуваат Дарио Барето Дамас, Жана Пенчева и Александар Георгиев. Музиката е на Цветан Момчилов, а графички дизајн на Ѓорѓи Десподов. Претставата на МОТ е поддржана од Министерството за култура на Северна Македонија и Град Скопје.

Авторка и режисерка на „Поезис на себството“ е Снјежана Премуш. Претставта е создадена и ја изведуваат Снјежана Премуш и Рок Вевар кои се и автори на текстовите, а во продукција на Федерација Институт Љубљана и копродукција на Бункер, Љубљана

За „Поезис на себството“ се посочува дека е неконвенционален танцово-теориски настан што експериментално, информативно и метафорично ги претставува пред гледачот релациите помеѓу телото, просторот и физичките закони кои управуваат со двете материјалности. Настанот користи комбинација на различни уметнички средства и елементи (предмети, тела, слики и јазични особености) и серија едноставни кинетички елементи и дејства во просторот. На извесен начин, пред гледачите ги изложува резултатите од неколкумесечниот процес, со што ја напушта веројатноста дека гледачите би следеле исклучиво оддалеку.

„Танцувај, танцувај, инаку сме изгубени („DOWL“) е претстава на Соња Преград од Хрватска, која е автор и режисер. Музиката е на Ника Печарина, а костимографија на Теа Кантоци. Настапуваат Ивана Бојаниќ, Викторија Бубало, Лана Хосни, Ана Јаворан, Ана Мрак, Ева Приечкова, Соња Преград.

Оваа претстава е дел од проектот НАМ и е ко-курирана од Ана Дубљевиќ, Викторија Илиоска и Соња Преград, со Биљана Тануровска – Ќулавковски, а во организација на Локомотива. Програмата на Локомотива на МОТ развиена преку (Non) Aligned Movements проектот и поддржана од Министерството за култура на Северна Македонија, Град Скопје, и Креативна Европа/Европски проекти на соработка во Западен Балкан