Годишниот самит на групата најразвиени индустриски земји (Г-7) почнува денеска со фокус на борбата против новиот коронавирус и климатските промени. На првиот ден од форумот во Карбис Беј, Велика Британија, лидерите се очекува да разговараат за обнова по пандемијата, со фокус на донирање на вакцини против ковид-19 и обезбедување на финансиска поддршка за производство на вакцини.
Домаќинот на тридневната средба, британскиот премиер Борис Џонсон синоќа изрази очекување дека земјите од Г-7 ќе донираат вкупно милијарда дози на вакцини, додека Британија ќе отстапи најмалку 100 милиони дози на сиромашните земји. Неколку часа претходно, американскиот претседател Џо Бајден вети дека неговата држава ќе донира 500 милиони дози вакцина од американската компанија „Фајзер“.
Вечерва британската кралица Елизабета Втора и престолонаследникот Чарлс ќе организираат прием во чест на лидерите на Г-7. Се очекува да се разговара и за заштита на животната средина и борбата против климатските промени.
Ова е прв самит на Г-7 во последните две години. Минатата година, форумот беше во видеоконференциски формат, поради пандемијата. Тоа е, исто така, прв голем меѓународен самит за новиот американски претседател Џо Бајден, кој ја презеде должноста во јануари. Специјални гости на форумот ќе бидат лидерите на Австралија, на Индија, на Јужна Африка и на Јужна Кореја кои беа поканети од домаќинот Велика Британија.