Судењето за организаторите на настаните од 27 април во парламентот, ќе продолжи на 4 септември со сослушување на сведоци предложени од одбраната на поранешниот собраниски спикер Трајко Вељаноски, откако денешното рочиште заврши со презентирање на материјалните докази.
На 4 септември треба да бидат сослушани 15 пратеници меѓу кои Трајчо Димков, Иван Стоилковиќ, Љупчо Димовски, Љиљана Кузмановска, Драган Данев, Панче Минов, Благоја Деспотовски и други. На предлог на поранешниот собраниски спикер, Трајко Вељаноски на денешното рочиште беше презентиран видео запис од продолжението на конститутивната седница на Собранието на 27 април во 2017 година.
Прво беше пуштен дел од обраќањето на Зоран Заев од собраниската говорница во кој повикува да не се крши Деловникот и да се заврши изборот на Талат Џафери за претседател на Собранието.
Со тоа, Вељаноски рече дека се покажува дека во испратената смс порака, тој само пренесува дел од обраќањето на Заев во кое вели дека ќе изберат претседател на Собранието и во ходник, па и во МАНУ. Вељаноски потоа побара да бидат пуштени делови од обраќањата на пратениците Дамјан Манчевски, Максим Димитриевски, Оливер Спасовски, Илија Димовски, Панче Минов и други од кои рече дека може да се види оти тримесечното доцнење на изборот не е по негова вина, туку на пратеничките групи.
На крај беше пуштен делот по паузата дадена во 17:11 часот и продолжението на седницата во 17:24 часот.
По процедуралните забелешки на Оливер Спасовски и на Илија Димовски, на говорница излегува и Крсто Муковски кој ја пее химната на Македонија, а од видеото се гледа како стануваат сите пратеници и на крајот добива силен аплауз. Потоа пратениицте од СДСМ извикуваат „гласање“, а од ВМРО-ДПМНЕ извикуваат „избори“ и „Македонија“.
Вељаноски укажа дека од посоченото се гледа оти тој не дава веднаш збор на Зекирија Ибраими, како што се вели од Обвинителство, туку дека има тројца пратеници кои добиваат процедурално по Мукоски, па потоа пратеникот Зекирија Ибрахими, добива право на збор и ја пее химната на албански.
Од снимката се гледа дека Вељаноски потоа ја прекинува седницата во 18:01 часот и кажува дека истата ќе продолжи наредниот ден во 11 часот.
„Од ова се гледа дека ништо не е направено спротивно од Деловникот. Дека ништо не е поинаку сега кога веќе трае еден месец“, изјави Вељаноски.
Случајот се наоѓа во доказна постапка и го води судијата Илија Трпков. Обвинети во овој предмет се поранешниот претседател на Собранието, Трајко Вељаноски, ексминистрите за транспорт и врски и за образование, Миле Јанакиевски и Спиро Ристовски, како и поранешниот директор на УБК, Владимир Атанасовски.
Тие се товарат дека сториле кривично дело „терористичко загрозување на уставниот поредок и безбедноста“.