Бугарија ја поддржува Македонија за членство во ЕУ и НАТО, истакна бугарскиот амбасадор во Скопје Иван Великов Петков пред Комисјата за европски прашања во македонското Собрание, презентирајќи ги приоритетие на Бугарското претседавање со ЕУ.
– Бугарија ги поддржува напорите на Владата на Македонија, опозицијата и граѓанското општество за постигнување на највисоките национални цели – членство во ЕУ и НАТО и тоа да се случи за време кога со Европскиот совет претседава токму Бугарија, рече Великов Петков.
Но, за да се случи тоа, посочи бугарскиот амбасадор, мора да се спроведат итните реформски приоритети.
Најави дека Бугарија за време на претседателството со ЕУ, ќе работи на зголемување на контактите меѓу земјите од Западен Балкан и подобрување на односите меѓу нив.
Амбасадорот Великов Петков изрази и задоволство што Договорот со за добрососедство со Бугарија денеска е ставен на ратификација во Собранието на Македонија.
Вицепремиерот за евроинтеграции Бујар Османи истакна дека е добро што оваа клучна историска година за Западен Балкан со ЕУ претседава соседна држава која во своите стратешки цели ја има евроинтеграцијата на земјите од регионот. Нагласи дека не можеме да очекуваме нашите внатрешни проблеми да ги реши некој друг и оти нашите реформи треба ние самите да ги спроведеме со цел да бидат одржливи, неповратни и инклузивни.
– Јануари и февруари се месеци во кои сите ние треба да покажеме јасни резултати – Владата, Собранието, судството и тоа во процес во кој сите страни ќе бидат дел од изградбата на нашата иднина. Секој вид на опструкција на овој процес во овие одлучувачки преломни моменти претставува опструкција на нашата иднина како држава, просперитетот на нашата економија, благосостојбата на нашите граѓани и перспективата на идните генерации. Доколку во овој период не оствариме видлив напредок во нашите реформи и во нашите односи со соседите во преговорите за името, верувам дека ќе го заслужиме долгоочекуваниот датум за почеток на преговори, рече Османи.
Министерот за надворешни работи Никола Димитров истакна дека 2018 е година за Македонија во која ќе направиме се за да го фатиме европскиот воз.
– Зимата е тука, но пролетта е на прагот. Ние во регионот имаме обврска да ја направиме иднината попросперитетна и помалку драматична, дури би сакал да имаме досаден Балкан. Нашите игри не треба да бидат игри на тронови, туку игри на реформи и резултати. Позитивен натпревар за напредни општества со европска иднина. Годинава останува да бидеме ефикасни и ревносни на нашиот реформски пат да направиме се што можеме да ја решиме и големата разлика околу името со нашите соседи и партнери во Атина. Ќе направиме се што е во нашите можности со надеж дека и од другата страна приодот ќе биде сличен дека ова е една историска шанса, рече Димитров.
Според евроамбасадорот Самуел Жбогар, она што се очекува од земјава во овој период е не само усвојување и прилагодување на легислативата, туку и да се остварат видливи резултати и да се создадат видливи и неповратни промени.
– Напредокот ќе биде измерен според имплементацијата на договорот од Пржино и идните реформски приоритети, како и добрососедските односи. Собранието има клучна улога во европската агенда и во постигнување отчетност на Владата. Уште поважно е да се осигура инклузивност, рече Жбогар.
Претседателот на Комисијата, Артан Груби, како што се наведува во соопштението, во своето воведно излагање посочи дека Македонија очекува на 12 јули на Самитот на НАТО во Брисел покана за членство, како и почеток на преговори за наше членство во ЕУ, во текот на бугарското претседавање со Советот на Унијата. Притоа, укажа дека мора да се направат потребните реформи во судството, безбедносниот систем, начинот на владеење, медиумите, борбата против корупцијата и другите задачи кои ги добиваме од Брисел. Исто така, ја нагласи важноста од што поскоро враќање на опозицијата во Парламентот.
Приоритети на бугарското претседателство со ЕУ кое ќе се одвива под мотото „Обединувањето ја прави силата“ се иднината намладите, европската перспектива за земјите од Запден Балкан, сигурноста и стабилноста и способности ориуенторани кон идинината.
