Арсен Венгер се подготвува за активирање на првата „бомба“ на „Емирати“ во зимскиот преоден рок. На изненадување на многумина, Французинот стокми 60 милиони евра за ангажман на Пјер Емерик Обамејанг кој би пристигнал во Арсенал како замена за Алексис Санчез иако Кина се споменуваше како наредна дестинација за габонскиот напаѓач на Борусија Дортмунд.

Бројни медиуми на Островот вечерва ја објавија информацијата за силниот интерес на Венгер за Обамејанг. Дел од нив дури пренесоа дека личните услови во зделката се речиси договорени без оглед што до скоро како замена за Чилеанецот беше пикиран младиот Бразилец Малком од Бордо.

„Милионерите“ од Дортмунд денеска ремизираа без голови со Волфсбург во Бундеслигата во меч за кој беше изоставен Обамејанг. Потегот во Борусија го образложија со недисциплина и недолично однесување за еден професионалец без притоа конкретно да посочат на што се однесуваат замерките кон голгетерот.

„Едноставно не можеме да толерираме такво однесување. Не знам што се случува во неговата глава во овој период. Досега беше беспрекорен професионалец меѓутоа ова повеќе нема смисла. Вака повеќе не можеме“, истакна Михаел Корк, спортски директор на Борусија Д.

Таткото на Обајмејанг истовреме се огласи преку социјалните мрежи и потврди дека неговиот син би можел да ја промени средината во јануари поради расистички навреди во германските медиуми на сметка на фудбалерот. Се тргна од осудата во еден весник кој напиша дека Габонецот прави „мајмунски циркус“ што е протолкувано како навреда на расна основа.

Можноста за скорешен трансфер на Обамејанг во Арсенал ја подгреа и Гилијам Балаг кој важи за добро информиран новинар кога во прашање се активности во дел од фудбалскиот пазар. Па, така и самиот тврди дека репрезентативецот на Габон сака во стројот на Венгер за што францускиот менаџер подготвил 60 милиони евра и сака што поскоро да го комплетира трансферот.

„Обамејанг цела година сака да замине од Борусија Д., но чека на вистинска понуда. Одби да се пресели во Кина со цел на повик од голем клуб што во моментот и се случува. Имам информации дека сака во Арсенал како замена за Санчез само што трансферот ќе биде реализиран во оној момент кога и на Чилеанецот. Расчистување на работата ќе има за два-три дена. Манчестер јунајтед е наводно заинтересиран за Санчез, но и Сити сè уште не е отпишан“, напиша Балаг.

Обамејанг е во Борусија Дортмунд од 2013 година. Меѓу „милионерите“ пристигна од Сент Етјен и во 143 настапи од тогаш постигна 98 погодоци. За репрезентацијата на Габон дебитира во 2009 година и досега има дадено 23 гола во 56 натпревари.