Абдураим Имери, неговата мајка и браќањата се сопственици на приватен имот во индустриската зона помеѓу Пинтија и Драчево, а на кој, според неговите тврдења, денес ЕВН во присуство на претставници на судот и полицијата влезе присилно за да отпочне поставување на далновод.
Од друга страна, од ЕВН велат ако истиот не се постави, постои сериозна опасност за снабдувањето со електрична енергија на 50.000 корисници од Драчево и градот Скопје.
Имери го купиле земјиштето пред година и пол и на него планираат изградба на фабрика во која вели тој, најмалку 300 луѓе ќе работат, но пред три дена добил известување дека ЕВН таму ќе отпочне со поставување на инсталација за пренесување на електрична енергија.
– Поседуваме документ, имаме имотен лист, земјиштето е купено пред година и пол, општината ни кажа дека можеме да градиме објект за производство, сега ЕВН дојде и побара да постави бандера, а земјиштето е мое. Ова е странска инвестиција, секаде во светот ги молат инвеститорите а ние ги бркаме, вели Абдураим Имери.
Тој дополнува дека ги почитува законите и државата, но вели, има документи за да го брани својот имот. Бил известен од страна на присутните надлежни лица дека дека во наредниот месец на неговиот имот ќе работи механизација која ќе го инсталира далноводот.
Неколку минути пред 14 часот, екипата за работа и механизацијата веќе беше пристигната, а потоа пристигнаа и неколку полициски возила за да обезбедат пристап внатре во имотот.
По речиси половина час расправија, беше отстранет еден од сопствениците, бидејќи како што рекоа извршителите, пречел во работата, за потоа присилно да влезат на земјиштето со механизацијата.
Но ЕВН пак, реагира дека далноводот постоел многу години пред да се појави семејството Имери, кое знаело точно кога го купувало земјиштето дека таму е предвидена инсталацијата.
„Ако не се постави новиот челичен решеткаст столб на далноводот кон Драчево, во сериозна опасност е доведено снабдувањето со електрична енергија на 50 000 корисници од Драчево и на градот Скопје. Овој далновод постои многу години пред да се појават сегашните сопственици или поточно пред да го купат земјиштето. Кога пред две години се свлече земјишттето и падна столбот, местото каде што треба да се постави новиот столб беше на Р. Македонија, а корисник сосема друго лице. Во последните две години ова земјиште е приватизирано и откупено од сегашните корисници. Две години ЕВН преговара со сопствениците и тие ништо не прифаќаат, планирајќи да градат други објекти на оваа локација. Но ЕВН не смее да го доведе во прашање снабдувањето на 50 000 граѓани и затоа со ова извршно судско решение почнавме да го поставуваме столбот“, се вели во реакцијата на ЕВН.
Сопствениците од Скопје, со судско решение се задолжени да не го попречуваат поставувањето на столбот.