Актуелните рестриктивни мерки што се применуваат во Македонија во борбата за спречување на ширењето на коронавирусот ќе траат најмалку до крајот на април. Ова го истакна министерот за здравство, Венко Филипче во интервјуто за Нова ТВ. Ги оцени како добри, дека го даваат посакуваниот резултат, а образложи и зошто ќе останат на сила заклучно со четвртиот месец од 2020 година.
„Овие мерки ќе траат до крајот на месец април. За тоа сме сигурни. Затоа што на тоа ни укажува времето на инкубација на кое биле пациентите кои секојдневно се дијагностицираат, нивната поврзаност со кластери што се веќе познати во нашата земја и затоа што овие рестриктивни мерки веќе даваат резултат, а тоа е линеарното зголемување на бројот на пациенти, а не експоненцијалното“, рече првиот човек на македонското здравство.
Прогнози до кога би траеле рестриктивните мерки во државата, пошироко во регионот, во Европа, па и светот, никој со сигурност не може да каже. Затоа, како што вели Филипче, секоја земја си има свој автентичен пристап што е детерминиран од фактори како организацијата на здравствениот систем, од бројот на здравствени работници што ги има на располагање, од епидемиолошките карактеристики на населението. Целта е, како што велат епидемиолозите, да се развлече т.н. епидемиолошка крива.
„Стратегијата на експерти и на Светската здравствена организација, ќе парафразирам е игра „топло-ладно“. Што значи тоа? – Кога бројот на ново дијагностицирани пациенти во одреден период ќе падне, односно да не биде голем, туку да оди линеарно, мерките на рестрикција постојано ќе се намалуваат и попуштаат“, потенцира Филипче.
Министерот за здравство истакна дека епидемиолошката состојба се следи интензивно и секојдневно и во зависност од тоа, ќе зависат и мерките дали ќе бидат поригорозни или ќе олабавуваат.
„Рестриктивните мерки може да се останат во одредени региони, по одреден број на недели или месеци, доколку се појави некоја втора крива, нешто за што сега има најава во Кина. Кинезите тоа го толкуваат со внесување на случаи од странство, па затоа го ограничија влезот на странски државјани, посебно во тие региони. Значи дека интензивно и секојдневно се следи епидемиолошката состојба и врз основа на ново дијагностицираните случаи, врз основа на нивната поврзаност со потеклото на инфекцијата, односно со кластерите, се прави стратегија како да се продолжи натаму, како да се интензивираат или како да се попушти со дел од рестриктивните мерки“, порачува Филипче кој е дециден дека борбата со коронавирусот ќе заврши во оној момент кога се добие вакцина.