Веста дека доби две номинации за „Оскар“, екипата на македонскиот документарец „Медена земја“ ја дочека во далечниот Еквадор. Режисерот Љубомир Стефанов на својот Фејсбук профил објави видео запис со кинематографот Самир Љума и режисерката Тамара Котевска со нивните реакции по селекцијата на Американската Академија за вклучување на македонското остварување во две трки за ласкавото признание.
Преку жената која случајно ја сретнавме, пред светот се отвори приказна – алегорија на една глобална слика каде што хуманото и натуралното се борат да преживеат. Атиџе и пчелите се прототип за новиот генски материјал, кој треба да победи во битката на титаните, каде што природата се бори со деструктивното.
https://www.facebook.com/ljubomir.stefanov/videos/10216145623293338
Среќни сме што светските критичари и членовите на Академијата го препознаа крикот на планетата, кој ечи меѓу фрејмовите во филмот. Ја открија големината на човекот преку големината на единката. Се разнишаа убедувањата дека радоста се крие во поседувањето.
Ова е првпат во историјата на „Оскарите“, документарен филм да е номиниран во две категории, што значи дека ова не е само успех со историски размери, туку потврдува дека документариот јазик влегува во ерата на негово вистинско вреднување, каде што стои рамо до рамо со фикционалната нарација, а поради својата реалност, заслужува посебна опсервација. Провоцира искрено сочувство, кое не се заборава по гледањето на филмот.
Филмот повикува на скромност, а кога ја гледаме љубовта во очите на гледачите, силно веруваме дека пораката е препознаена и дека скромноста е новото време низ кое со радост ќе зачекориме.
Уште еднаш, бескрајна благодарност до членовите на Академијата што филмот го нарекоа – материјал заслужен за Оскар“, напишаа тие на фан профилот на „Медена земја“ на Фејсбук.
Единствениот македонски филм кој добил номинација за Оскар е филмот „Пред дождот“ на Милчо Манчевски во 1995 година.
Меѓу петте номинирани за најдобар документарец покрај „Медена земја“ се и „Пештерата“, „Американска фабрика“, „Доба на демократија“ и „За Сама“. За најдобар странски филм номинации добија „Клетници“ од Франција „Корпус кристи“ од Полска, „Болка и слава“ од Шпанија и „Паразит“ од Јужна Кореја.