Апелирам опозицијата во наредниот период да го одблокира законот, тоа е одличен проект, граѓаните заслужуваат нова модерна болница, рече Филипче
Горд сум на сите процеси кои се одвиваа инклузивно, навистина сум горд на големата помош на премиерот Заев што интервениравме за да се зголемат примањата на здравствените работници. Горд сум што ниту еден пациент со ретка болест не остана без лек и што го укинавме паралелниот увоз на лекови. Горд сум на тимскиот дух, кажа денеска министерот за здравство во заминување, Венко Филипче.
А еве за што тој најмногу жали:
– Тоа за што најмногу жалам е што не успеавме да го почнеме проектот за нов клинички центар. Убеден сум дека тоа е единствениот начин да се унапреди здравствениот систем на највисоко ниво на здравствена заштита – тоа е терцијерната. За да се модернизираат условите во кои работиме, и покрај сите реновирања кои ги правиме, сепак, новата модерна медицина, интегрираниот тип на здравствена услуга бараат и поинаква инфраструктура – рече Филипче.
Тој додаде:
– Има нова апаратура која не може да се внесе во малите операциони сали коишто сега ги имаме, тоа бара еден нов концепт. Апелирам опозицијата во периодот кој доаѓа да го одблокира законот, тоа е одличен проект, граѓаните заслужуваат нова модерна болница, додаде министерот.
Филипче кажа и дека не се познава со Беким Сали, а најави дека ќе иницира средба со новиот министер за здравство.
– Со Беким Сали не се познавам лично, но ќе иницирам состанок. Ќе му оставам порака да биде одговорен и транспарентен и достапен за новинарите, додаде Филипче.
Министерот го истакна и функционирањето во времето на пандемијата со ковид-19.
– Прво, горд сум што имавме одлична соработка и координација во едни од најтешките периоди во историјата на државата. За жал, нè снајде пандемија во целиот свет и кај нас. Ние, здравствените работници покажавме дека со ентузијазам и со голема желба и љубов кон работата, може да се успее во целокупниот третман на пациентите и реорганизација на пациентите. Успеавме да обезбедиме болнички кревети и третман за сите пациенти. Понатаму, горд сум на тоа што направивме сите процеси во Министерството за здравство инклузивно да се одвиваат – никој да не останува по страна и во креирањето на политиките да учествуваат сите чинители – колегите со стручните здруженија, здруженијата на пациенти со различни болести и граѓанските организации. Ме прави горд и тоа што, со голема помош на премиерот Зоран Заев, успеавме да инвестираме речиси 30 милиони евра во овие четири години за да се зголемат примањата на здравствените работници и сега платите, заедно со дежурствата, некаде се скоро удвоени во однос на 2017 година, рече министерот Филипче, кој стапи на оваа функција во 2017 година.