Во својот денешен говор во салата “Борис Трајковски” лидерот на ВМРО-ДПМНЕ немаше нежни зборови за опозицијата, СЈО и медиумите кои, според него, се блиски до СДСМ.
Тој рече дека СДСМ покажаа дека се алчни за власт и моќ преку безидејната екипа која го гледа само личниот и партискиот интерес.
Во својот како и секогаш долг говор, Груевски ја нападна најголемата опозициска партија како “куп на деструктивци и манипулатори” кои “едно денес едно зборуваат а утре друго прават”
Според него, СДСМ не нуди алтернатива и покажува дека партијата, по 10 години откако беше поразена на избори, “не само што не напредувала туку назадувала”.
Потоа следеше напад на новата шефица на информативната програма на МРТВ Санта Аргировска. Груевски не се колебаше да навредува и ја нарече “мизерија”.
Според Груевски најпоразително било што СДСМ во овие 10 години зборувале дека нема слобода на медиуми и кодошеле за да се најде државата во што полоша меѓународна позиција, ги активирале “сите невладини организации, лажеа и клеветеа со сите сили и во тоа во голема мера им успеа, за тоа ги бива, слободата на медиуми стана една од клучните забелешки на ЕУ”, рече Груевски. И додаде дека наместо “непартиски и професионален човек, промена што ќе изненади”, СДСМ ја именувале Санта Аргирова, поранешна шефица на кабинет на Илинка Митрева која во тоа време беше потпретседател на СДСМ:
“И оддеднаш излегува Заев со објава дека на тоа место ќе дојде поранешниот најблизок соработник и шеф на кабинет на потпретседателот на СДСМ во тоа време и Министер за надворешни работи Илинка Митрева. Треба ли да потсетувам за срамните интервјуа со претходно дадените прашања и по шест пати враќање да се сними личноста која треба да му помогне на СДСМ, со тоа што за нас ќе се обиде да создаде перцепција дека сме биле криминалци и незаконски сме работеле. Толку од независното новинарство на СДСМ и толку од слободата на медиумите како што тие ја разбираат. Па потоа сите платенички новинари на СДСМ потрчаа оваа мизерија да ја оправдуваат и да ја вадат од кал”.
Потоа следеше на напад врз СЈО.
Според Груевски,СЈО е формирано со добра намера но “тие луѓе се очевидни поддржувачи на СДСМ” и “главен инструмент на Заев за доаѓање на власт”, вели екс премиерот.
Пет пати, едно по друго, Груевски повтори дека на ВМРО-ДПМНЕ и на коалицијата и се потребни 63 пратеници на овие избори.
Нивните прес конференции, според Груевски, се “спектакуларни без ниту еден валиден доказ” и тие “допрва планираат да станат актери во оваа кампања со канење на распити на кои однапред ќе бидат поканети медиумите на СДСМ”. Груевски е уверен дека СЈО ќе испраќа отсега уште повеќе покани за суд и прес конференции.
На крајот на говорот Груевски рече дека ВМРО-ДПМНЕ ќе победи на изборите и пет пати, едно по друго, повтори на ВМРО-ДПМНЕ и на коалицијата и се потребни 63 пратеници “што ќе значи силна порака за стабилна и сигурна Македонија”.
Груевски изјави исто така дека СДСМ нема поддршка од народот и “ќе сторат се да не дисквалифицираат и ќе се обидат не ги признаат изборите”. И ги предупреди неговите поддржувачи дека Заев ветува не само двојазична држава туку цело редизајнирање на државата.
На крајот повика прекинат поделбите, вети дека ако дојде на власт нема да има реваншизам и најави големо присуство на терен во предизборието.