Претседателот на Америка, Доналд Трамп изминативе денови служи за потсмев во јавноста по забелешки кои ги презентираше кои се однесуваа на наводни напади во Шведска. Но што е она што ја разбрани јавноста?
За време на својот долг говор на собир во Флорида, каде ја правдаше својата надворешна политика, односно забраната за влез во САД која ја планираше за седум претежно муслимански земји, Трамп реферираше на “теророт во Шведска“.
Шведска за време на бегалската криза инаку примаше околу 200.000 бегалци на своја територија.
И Трамп би бил во право, но само доколку информациите кои ги сподели со јавноста ги добиеше од службите или од владата на Шведска. Спротивно на тоа, гледајќи една од американските телевизии каде што се презентирал документарен филм, Трамп всушност гледал снимки од документарецот па заклучил дека токму претходната ноќ таму се случувал терористички напад организиран од мигрантите.
„Видете што се случува. Мораме да ја чуваме безбедноста на нашата земја. Видете што се случува во Германија и што се случи минатата вечер во Шведска. Земаа луѓе во голем број и сега имаат незамисливи проблеми“, рече Трамп во саботата.
По реакциите на некои политичари кои се потсмеваа со Трамп, најгласен меѓу нив беше Карл Билт кој на Твитер напиша: „Шведска? Терор? Добро, што пушел овој човек?“
Но всушност шведските сатиричари го имаа најинтересниот одговор во видео во кое заклучија дека Трамп со сигурност ја ставил Шведска на второ место веднаш зад Америка.
https://www.youtube.com/watch?v=TmJiNoAxl8k
„Драг Претседателе конечно се освестивте и драго ни е што Шведска ја ставивте на второ место. По Вашиот говор сега сме сигурни во ова. За сите луѓе кои не се информирани како вас, ова се случи во петокот навечер во Шведска: Познатиот пејач Ове Торнквист имаше технички проблеми за време на пробата за најголемиот музички концерт во Шведска, многу тажно; Имавме тешки временски услови на северниот дел и патот Е10 беше затворен. Ова е надвор од контрола; Полицијата бркаше кола за пребрзо возење во Стокхолм. Нашата полиција е силна и ја запре колата“, се вели меѓу другото во комичното видео.
Ова не е прв пат Трамп да признае дека селективно ги следи медиумите, односно дека сака да ги гледа медиумите кои речиси и не ги ставаат под лупа неговите политики. Тој призна дека се информирал од „ФоксЊуз“ кој пак го презентирал документарецот на Ами Хоровиц.
Инаку, и покрај тоа што се обиде да ги одбрани своите политики на овој собир во Флорида, забраната на Трамп, донесена на 27.јануари за луѓето од Ирак, Иран, Либија, Сомалија, Судан, Сирија и Јемен падна пред федералните судови па неговата администрација прави измени за да ја стави одлуката повторно пред институциите.