Министерството за внатрешни работи соопшти дека целиот протест што се одржа на 20 јуни во Скопје е снимен со камери и е фотографиран, врз основа на што ќе се врши препознавање на лицата кои ги оштетувале објектите. МВР објави и видео материјал од кој може да се види дека полицискиот службеник кој снимал, бил во зградата на Министерството за правда. Во продолжение следува целото соопштение од МВР и сите досегашни сознанија за протестот.
На 20.06.2016 година во периодот од 18:00 до 22:50 часот, во централното градско подрачје, се одржал протест организиран од група граѓани – граѓанско здружение „Протестирам“, а поддржан од невладини организации и политички партии.
Протестот започнал околу 18:00 часот со собирање на граѓаните пред Специјалното јавно обвинителство каде околу 19:30 часот имало околу 13.000 граѓани. Истите околу 19:40 часот, започнале да се движат од ул.„Митрополит Теодосиј Гологанов“, по булевар ,,Св.Климент Охридски“ до булевар ,,Илинден“ каде околу 19:50 часот пристигнале пред објектот на Владата на РМ. По краткото задржување до околу 20:30 часот каде од страна на некои од учесниците бил одржан говор, насобраната маса на граѓани околу 20:35 часот од бул.Илинден“ се упатиле кон бул. ,,ВМРО“ од каде еден дел од ѓраѓаните се упатиле по улица ,,Максим Горки“ кон Плоштад Македонија, а додека останатите -поголема група се упатиле кон улица ,,Димитрие Чуповски“.
Истите околу 20:49 часот пристигнале пред објектот на Министерството за правда каде од страна на неколку лица кои биле дел од толпата на граѓани со фрлање на бои и со употреба на разни предмети извршиле оштетувања на фасадата како и скршиле неколку стакла од прозорците на Министерството за Правда. После тоа толпата на граѓани се упала кон Собранието на РМ каде исто така дел од лицата со употреба на чатал фрлале балони наполнети со боја при што била оштетена фасадата на Собранието на РМ . Околу 21:20 часот наспроти објектот на Собранието на РМ , поточно во ,,Жена Парк“ еден дел од насобраните граѓани од споменикот ,,Прометеј“ го тргнале платното како и дрвените штици поставени на металното скеле околу споменикот и со употреба на бои и разни предмети бил оштетен споменикот на Прометеј при што истите биле спречени во натамошните постапки со интервенција од Единицата за Брзо распоредување
Од страна на ЕУМНА при СВР Скопје било извршено фотографирање на оштетувањето на горенаведените објекти за што се сочинети Записници за увид, како и фотоалбуми .
Од страна на Полициски Службеници од ЕУМНА при СВР Скопје е извршено снимање на протестот кој се одвивал пред горенаведените објекти, а воедно е извршено и превземање на видео материјали и фотографии од отворени извори на податоци-интернет за што е сочинето ЦД со видео запис .
Од страна на Полициски Службеници при СВР Скопје кои службено биле ангажирани за обезбедување на протестите се препознаени неколку лица кои ги вршеле оштетувања на објектите.
Од страна на полициски службеници дополнително ке бидат набавени видео записи од безбедносните камери поставени во непосредна близина на Министерството за Правда, Собранието на РМ лоцирано на бул „ 11 октомври “ бб Скопје, споменикот на „ Прометеј “ лоциран во жена парк бул „ 11 Октомври “ бб Скопје за ден 20.06.2016 год. за периодот од 18.00 часот до 22.00 часот кога се извршени оштетувањата , за понатамошна постапка.