Во судир меѓу две ривалски банди во затвор во Еквадор загинаа 116 луѓе, а 80 се повредени што претставува најкрвав биланс во еквадорските затвори во историјата на таа јужноамериканска земја. Најмалку пет затвореници се обезглавени во затворот во градот Гвајакил, додека другите се застрелани, објави денеска британската телевизиска мрежа „Би-Би-Си“.
Затворот има конфликтни банди за кои се верува дека имаат врска со мексикански наркокартели и се смета за еден од најопасните затвори во земјата. Локалните медиуми јавуваат дека немирите биле нарачани од моќните мексикански наркокартели кои дејствуваат во Еквадор.
https://www.youtube.com/watch?v=ojWsA9HevDQ&t=192s
Командирот на полицијата, Фаусто Буенањо рече дека затворениците фрлале гранати и дека околу 400 чувари учествувале во воспоставувањето мир во затворот. Полицијата успеа да спаси шест готвачи кои останале заробени во еден дел од зградата.
Претседателот Гилермо Ласо прогласи вонредна состојба во сите затвори. Во Еквадор има околу 60 затвори со капацитет од 29.000 места, но нивниот капацитет е надминат за околу 30 проценти и во нив има 38.000 затвореници кои се надгледувани од 1.500 чувари.
Според експерти, за ефикасна контрола на така голем број на затвореници се потребни 4.000 чувари.