Новиот владин кабинет им дозволи на медиумите да направат обиколка во зградата, пред почетокот на првата седница. Ова е за прв пат да се дозволи влез во барокната зграда по реновирањето во време на владеењето на екс премиерот Никола Груевски.
Снимателите и фоторепортерите имаа прилика да фрлат поглед на луксузниот ентериер, скапите теписи и подови, сваровски лустери, дрворезби, уметнички слики и целиот раскош во кој работел претходниот владин состав.
Владата и однадвор и одвнатре, откако беше „нашминкана“ во барок стил, беше чувана далеку од очите на јавноста. Претходно, Груевски и министрите организираа и „Црвен тепих за граѓаните“, но и таа манифестација прекина во 2014 година, а Владата бастионот го зацрвсти со поставувањето кована железна ограда околу објектот и беше забранет влез и во дворот.
Според официјалните документи од Електронскиот систем за јавни набавки, за фасадата и ентериерот на Владата, се платени 16.491.000 евра, а кована железна ограда чини 700.000 евра.
Новиот кабинет на премиерот Зоран Заев денеска ја одржува првата седница, на која ќе се распределуваат ресорите и портфолијата на министрите без ресори и ќе се поставуваат заменици претседатели на Владата, ќе се избира генерален секретар, шеф на кабинет и ќе се воспостават постојните и ад хок комисиите во Владата за да може да се постават стартните контури на Владата, најави премиерот Зоран Заев.