Пожарникарите и денес од копно и од воздух се борат со пожарот на југозападот на Турција кај познатото летувалиште Мармарис, откако огнот повторно се рашири поради високите температури и ветрот, пренесува Ројтерс.

На снимките се гледа како чад се извива над ридот и возила со полициски водени топови кои им помагаат на пожарникарите, додека огнот се шири низ шумата во слабо населена област.

Хеликоптери и авиони во текот на целиот вчерашен ден од воздух го гаселе пожарот, а властите кажаа дека денес повторно се вратиле по паузата во текот на ноќта.

Турската управа за шумарство соопшти дека 27 хеликоптери и 14 авиони ќе бидат денес вклучени во гасењето на пожарите.

Причината за пожарот кој избил во вторникот околу 20 часот сè уште не е позната.

„Вчера соопштивме дека пожарот главно е под контрола, но јакнењето на ветрот и порастот на температурите доведоа до тоа огнот повторно да се рашири“, кажа турскиот министер за шумарство Вахит Кириши.

Тој наведе дека до сега се евакуирани 150 луѓе од околу 50 куќи во околината на летувалиштето Мармарис, а дека околу 2.600 луѓе работат на локализација на пожарот.

Пожарите минатото лето, од кои повеќето исто така беа во близина на Мармарис, беа најинтензивните во Турција до сега, а Медитеранот станува жариште на шумски пожари, според податоците на службата за климатски промени Коперникус, наведува Ројтерс.