Позитивно лице на ковид-19 кое е ставено во изолација за лекување со решение на Државниот санитарен здравствен инспекторат (ДСЗИ), може да го напушти местото со најава на бројот 192, меѓутоа и по претходна координација со матичниот доктор, епидемиолог или специјалист инфектолог во најблиската болница.
За ова денеска информираше директорката на ДСЗИ, Ирина Бухова Сотирова на прес-конференција во Владата по извршените инспекциски надзори во Центарот за јавно здравје Куманово, Здрвствен дом Куманово – единица за медицинска помош, Општата болница Куманово и Одделението за инфективни болести во Куманово, при што нагласи дека само со јавување на 192 по издаденото решение не се овозможува излегување надвор од протоколот.
Директорката на ДСЗИ апелира до граѓаните да ги почитуваат мерките и правилата бидејќи, како што рече, доколку сите позитивни на ковид-19 самоволно излезат без почитување на протоколот ќе ги доведат во опасност граѓаните во државава со заразување со вирусот. Овој апел, според неа, е поради случувањата од пред неколку дена во Куманово каде лица во самоизолација самоволно ги напуштале своите домови за да се тестираат без почитување на протоколот.
„Согласно решението издадено од ДСЗИ и протоколот за позитивни лица, тестирањето на позитивни лица кои се наоѓаат во домашна самоизолација и домашно лекување се изведува исклучиво по 14. ден во временска разлика од 24 до 48 часа во лабораторија на Институтот за јавно здравје Скопје“, истакна Сотирова-Бухова.
Таа информираше дека од 30 март до вчера, ДСЗИ има издадено 3.324 решенија за домашна самоизолација по основ на контакти и 994 решенија на позитивни лица кои се на домашно лекување и домашна самоизолација.