Министерот за внатрешни работи Митко Чавков, наместо да даде конкретен одговор дали поранешната министерката Гордана Јанкулоска и екс шефот на УБК Сашо Мијалков се уште имаат обезбедување од МВР, тој го објаснуваше законот.
На новинарско прашање кои поранешни функционери имаат телохранители и колкава е нивната бројка, Чавков рече дека не би сакал да прејудицира со бројки, ниту пак соопшти нечие име. Само објасни дека обезбедување од МВР се доделува на функционери кои имаат сериозни закани по нивниот живот.
„ Уредбата е сменета во насока на создавање на правни претпоставки за давање на обезбедување за лица на актуелни и поранешни функционери да добијат обезбедување за неопределен период се додека траат реални, конкретни закани по нивните животи“, рече Чавков на денешната прес конференција.
Како што објави НОВА, на владината седница на 23 август е сменета „Уредбата за личности и објекти што се обезбедуваат“ и наместо како досега – екс функционери да имаат обезбедување „најмногу до една година“ по завршување на функцијата, сега имаат можност да имаат телохранители на државна сметка „додека трае опасноста“ по нивните животи.
Досега, рече Чавков, по промената на законската можност ниту еден актуелен или екс функционер не побарал полициска заштита. Проценката за ризиците по нивната безбедност ја врши МВР.