Едно лице загина во експлозија на бомбаш самоубиец во такси возило во Ливерпул. Преживеа таксистот кој е најзаслужен што е избегната поголема трагедија со оглед експлозивот бил активиран пред болница.
Надзорните камери го снимиле моментот на експлозијата. На снимката се гледа како такси возило влегува на паркингот на болницата и експлодира во моментот на паркирање, пишува „Дејли Мејл“.
Се чини дека таксистот Пери (45) бил заложник на бомбашите и дека им дал знак на граѓаните да не се приближуваат кон автомобилот, бидејќи на видеото се гледа како само неколку секунди по експлозијата, маж притрчал до возилото и го извлекол.
Според неофицијални информации, таксистот всушност го заклучил убиецот во автомобилот по цена на сопствениот живот и на тој начин го спречил да влезе во болницата и да ја активира бомбата.
Граѓаните веруваат дека станува збор за терористички чин, дека целта всушност била катедралата во Ливерпул, каде во моментот на нападот имало многу луѓе, но дека поради гужвите во градот, бомбашот го пренасочил таксистот во болницата во која имал намера да приреди крвав пир.
Сè уште не се познати мотивите за експлозијата, како и кој е бомбашот-самоубиец, но во врска со случајот во областа Кенсингтон во Ливерпул се уапсени мажи на возраст од 21, 26 и 29 години за нивната вмешаност во експлозијата.