Дел од пратениците денеска почнаа да доаѓаат на работа. Меѓу првите дојде техничкио премиер и пратеник, Емил Димитриев, а на работа беше дојден и новоизбраниот претседател на Парламентот, Талат Џафери. Пратеникот од ВМРО-ДПМНЕ, Илија Димовски, не беше расположен за изјава по инцидентите во четвртокот. Пратеничката од Социјалистичката партија, Владанка Авировиќ, која за време на нередите беше во собраниската сала за седници, вели дека не слушнала и не видела дека демонстрантите ги тепаат нејзините колеги од СДСМ и Алијанса на Албанците.
Околу Собранието и натаму има полиција, од униформирана, до специјалци со хермелини. Денеска во Парламентот нема активности. Седница не е закажана. Прес центарот каде беа тепани пратениците е пломбиран се додека не заврши увидот од истражните органи. Внатре под клуч се чуваат сите реквизити, опремата од снимателите со кои се фрлаше по пратениците.
Пред прес центарот и натаму стои кршот и нередот кој го оставија зад себе насилниците. Хигиеничарки со крпи го чистеа сметот. Но, она што не може да се избрише се снимките со раскрвавени глави, разулавена толпа, лица со фантомки и пратеници и функционери од ВМРО-ДПМНЕ кои се поздравуваат и со насмевки им аплаудираат на насилниците.
