Премиерот Зоран Заев изјави дека очекува во денешниот телефонски разговор со неговиот грчки колега Алексис Ципрас да бидат заокружени сите аспекти и да биде постигнат договор за долгогодишниот спор за името.

„ Вчера имавме навистина квалитетно унапредување на разговорите. Се надевам дека денеска ќе можеме нешто убаво да и соопштиме на јавноста. Реков дека сум оптимист и оти е возможно да се постигне договор, но денеска имаме уште еден суштествен разговор, за мене многу важен. Се надевам дека ќе ги заокружиме сите аспекти за да го исполниме очекувањето на двете страни“ рече Заев.

Заев посочи дека двајцата премиери, двајцата министри за надворешни работи, двете Влади и огромно мнозинство на граѓани на двете земји се заинтересирани за конечно решавање на овој долгогодишен проблем.

„ Ако денеска се случи, дај Боже договор, ние веднаш тоа ќе го соопштиме со сите детали, а верувам ако има договор тогаш би требало да правиме агенди. За Преспа знаеме заради тоа што беше желба уште многу одамна дури во преговарачкиот процес да се направи една средба. Но, во секој случај јас би почекал, да одиме чекор по чекор, да видиме прво дали ќе има договор, а ако има договор веднаш ќе ги договориме и агендите, агендите на сооопштување и информирање дома на сите политички чинители на граѓаните, но и делот на евентуалното потпишување“ рече Заев, за пишувањата во грчките медиуми дека евентуалниот договор може да биде потпишан претстојниот викенд во Преспа.

Вели дека ќе направи се за да се склучи договор со Грција кој ќе биде достоинствен и ќе го сочувува нашиот идентитет и ќе ги чува интересите на граѓаните и на Република Македонија, обезбедувајќи и евроатлантска перспектива.

Тој ги коментираше и ставот на Иванов кој преку соопштение оцени дека Заев манипулирал со јавноста кога рекол дека евентуалното отфрлање на Договорот со Грција ќе ги загрози перспективите на Македонија за влез во ЕУ и НАТО.

„Граѓаните се тие кои ќе одлучат на референдум, а секако јас како премиер и господинот Ѓорге Иванов како претседател треба да им помогнеме на граѓаните, а не да им одмогнеме. Ние политичарите треба да им служиме на граѓаните и треба да градиме соработки, да ја унапредуваме Македонија во сите нејзини перспективи“ кажа Заев и додаде дека се знаат перспективите ако се реши проблемот -„ знаеме дека интеграциите ни се достапни, знаеме дека веднаш стануваме членка на НАТО, знаеме дека почнуваме преговори со ЕУ. Сето тоа ни е на повидок, наше е да одлучиме“.