Време е сите ние, како поединци, но и како општество да се подготвиме за новата нормалност, да живееме со коронавирусот. Кризата спласнува и се држи под контрола, но вирусот сè уште е присутен. Затоа не смееме да се опуштиме, порача лидерот на СДСМ, Зоран Заев во видео обраќањето до јавноста кое следува по вчерашното олабавување на дел од рестриктивните мерки на Владата во насока за спречување на ширењето на коронавирусот.
„Борбата со коронавирусот треба да ја продолжиме преку целосно почитување на мерките за заштита на здравјето. Носењето заштитна опрема на лицето, како маска или марама, одржувањето физичка дистанца и зголемена лична хигиена се дел од нашето ново секојдневие. Овие основни мерки за заштита мора да бидат наше правило од кое нема да отстапуваме. Наш заеднички влог за новата нормалност и заштита на здравјето на луѓето“, истакна Заев.
На тој начин, вели тој, „сите ние, делуваме како тим. Заеднички си помагаме, но им помагаме и на здравствените работници кои со месеци се на првата линија на борбата со вирусот“. Новата нормалност, според него, значи дека живеачката ќе продолжи согласно протоколите за заштита, а со тоа и секојдневните обврски и активности – семејни, приватни и професионални. Во таква нова нормалност, нагласи лидерот на владеачката партија, ќе се одвиваат и сите процеси во нашето општество.
„Така ќе функционираат градинките, училиштата, факултетите, јавниот живот, театрите, фабриките, јавниот транспорт, итн. Политичкиот систем кој денес е во крајно комплицирана состојба, исто така, ќе функционира во рамки на оваа нормалност. На граѓаните, на државата, им се неопходни законодавна и извршна власт, ново Собрание и политичка Влада со полн капацитет и целосен, нов легитимитет од граѓаните. Институции со целосен легитимитет за да создадат услови за новата нормалност и подготвени да го дочекаме новиот бран на коронавирусот наесен.Нашата татковина има потреба од избори во првиот можен термин за да го дочекаме септември подготвени. Со полн капацитет да го заштитиме здравјето на граѓаните и да ја рестартираме македонската економија. Новата нормалност значи организирање на изборен процес, кампања и гласање согласно здравствените протоколи пропишани од надлежните институции. Сто отсто сигурни избори за граѓаните, за нивното здравје, за сите учесници во изборниот процес. Покажавме дека заедно можеме да се избориме со невидливиот непријател и да го заштитиме јавното здравје. Сега е време да покажеме дека заедно можеме да ја обезбедиме новата нормалност, да го заштитиме здравјето и да ја рестартираме македонската економија“, вели Заев во видео обраќањето.