Претседателот на Украина Володимир Зеленски денеска пристигна во Брисел како дел од минитурнејата низ европските метрополи со цел да ги охрабри лидерите на ЕУ да одобрат поголема помош за Украина во вооружување и брз почеток на преговорите за членство на земјата во ЕУ, објави Ројтерс.
Тој долета од Париз со францускиот претседател Емануел Макрон, кој му го додели Големиот крст на француската Легија на честа.
На влезот во Парламентот на ЕУ се пушташе химната на Украина, а потоа и европската.
„Украина ќе ја добие војната, а победничката Украина ќе биде членка на Европската Унија“, порача Зеленски во Европскиот парламент.
Говорот го почна со поздравот „Слава на Украина“, на што пратениците одговорија „Слава на хероите“. Неговиот говор беше проследен со долги аплаузи.
Зеленски во својот говор зборуваше за европскиот начин на живот, за кој рече дека се брани во Украина.
„Ако Украина падне, вашиот начин на живот ќе исчезне. Бранејќи се себеси, ние ве браниме вас“, рече Зеленски.
„Ние Украинците се браниме на бојното поле заедно со вас, се браниме од најголемата антиевропска закана на современиот свет“, рече Зеленски.
Тој додаде дека рускиот режим не се бори само за територија, туку и за уништување на европските вредности, европскиот начин на живот и дека 140-те милиони Руси ги гледа само како топовско месо, потенцијални носачи на пушки.