Енди Мареј останува во игра за одбрана на титулата на Вимблдон. Британецот се пласира во осминафинале по триумфот над жилавиот Италијанец, Фабио Фоњини, 29. светски рекет, со 6:2, 4:6, 6:1, 7:5 и негов нареден ривал во Лондон е Беноа Пер од Франција.
Место меѓу 16. најдобри на третиот гренслем во сезоната осигура и Рафаел Надал. Шпанецот во три сета го елиминира Качанов со 6:1, 6:4, 7:6. На Вимблдон, барем викендот, остануваат и Хрватот Марин Чилиќ, Луксембуржанецот Жил Милер, Баутиста Агут од Шпанија и Кевин Андерсон.
Мракот не дозволи комплетирање на програмата на машкиот дел од турнирот во петтиот натпреварувачки ден, па Цонга и Квери беа принудени да запрат при резултат 2:2 во сетови и водство на Амерканецот со 6:5 во решавачкиот и да продолжат во сабота.
Ана Коњух го оствари резултатот на денот во Лондон. Хрватската тенисерка успеа да слави над Доминика Цибулкова со 7:6, 3:6, 6:4 и да закаже дуел со Венус Вилијамс во четвртото коло. Осминафиналето кај девојките носи и пресметка меѓу Викторија Азаренка и Симона Халеп. Белорусинката со 3:6, 6:1, 6:4 ја совлада Британката Хедер Вотсон, а Романката беше подобра од Шуаи Пенг од Кина со 6:4, 7:6.
Победи во два сета забележаа и четвртата носителка, Елина Свитолона од Украина над Германката Витхефт како и шестиот рекет на Вимблдон, Џоана Конта која немаше проблеми во мечот со грчката ривалка Сакари за конечни 6:4, 6:1.
Осминафинале на неофицијалното светско тениско првенство ќе игра и сензационалната шампионка од Ролан Гарос, Јелена Остапенко. Летонката во третото коло ја порази Камила Џорџи од Италија со 7:5, 7:5.
Комплетни резултати на Вимблдон од натпреварувачки ден 5
МАЖИ, 3 КОЛО
Мареј (1., В. Британија) – Фоњини (28., Италија) 6:2, 4:6, 6:1, 7:5
Надал (4., Шпанија) – Качанов (30., Русија) 6:1, 6:4, 7:6
Чилиќ (7., Хрватска) – Џонсон (26., САД) 6:4, 7:6, 6:4
Милер (16., Луксембург) – Бедене (В. Британија) 7:6, 7:5, 6:4
Баутиста Агут (18., Шпанија) – Нишикори (9., Јапонија) 6:4, 7:6, 3:6, 6:3
Андерсон (Ј. Африка) – Бемелманс (Белгија) 7:6, 6:4, 6:3
Пер (Франција) – Јановиц (Полска) 6:2, 7:6, 6:3
ЖЕНИ, 3 КОЛО
Халеп (2., Романија) – Пенг (Кина) 6:4, 7:6
Свитолина (4., Украина) – Витхефт (Германија) 6:1, 7:5
Конта (6., В. Британија) – Сакари (Грција) 6:4, 6:1
Коњух (27., Хрватска) – Цибулкова (8., Словачка) 7:6, 3:6, 6:4
В. Вилијамс (10., САД) – Осака (Јапонија) 7:6, 6:4
Остапенко (13., Летонија) – Џорџи (Италија) 7:5, 7:5
Гарсија (21., Франција) – Бренгл (САД) 6:4, 6:3
Азаренка (Белорусија) – Вотсон (В. Британија) 3:6, 6:1, 6:4